Գերմանիան պաշտպանում է ՀՀ և ԱՀ տարածքային ամբողջականությունը, սակայն սահմանի հետ կապված բարդ խնդիրներ կան․ Բերբոք

Գերմանիան պաշտպանում է Հայաստանի և Ադրբեջանի տարածքային ամբողջականությունը, սակայն սահմանի հետ կապված բարդ խնդիրներ կան։ Այս մասին Երևանում կայացած մամուլի ասուլիսում հայտարարել է Գերմանիայի արտգործնախարար Աննալենա Բերբոքը։

Նախարարը կոչ է արել Բաքվին և Երևանին շարունակել հանդիպումները բանակցությունների սեղանի շուրջ։ «Գերմանիան պաշտպանում է Հայաստանի և Ադրբեջանի տարածքային ամբողջականությունը։ Սա բանակցությունների հիմքն է։ Շատ դժվար հարցեր են առաջանում սահմանների վերաբերյալ: Հայաստանի և Ադրբեջանի համար մեծ խնդիր է գտնել լուծում, որը հույսի շող կլինի այն մարդկանց համար, ովքեր ցանկանում են ապրել խաղաղ պայմաններում»,- ասել է Բերբոքը՝ հավելելով, որ ԵՄ-ն և Գերմանիան հանդես են եկել որպես ազնիվ միջնորդ կողմերի միջև, և Շառլ Միշելի ջանքերը կարող են կամուրջ դառնալ խաղաղության հասնելու համար։

«Ուստի անհրաժեշտ է վերսկսել բանակցությունները»,- ընդգծել է նախարարը՝ արտահայտվելով ԵՄ առաքելության ամրապնդման և ընդլայնման օգտին։ «Առաքելության միջոցով մենք փորձում ենք ուղղակի օգնություն ցուցաբերել Հայաստանին, հասնել կայունության և վստահության»։

Ըստ նրա՝ ԵՄ-ն Հայաստանում այս առաքելության միջոցով հանդես է գալիս որպես չեզոք միջնորդ, և այդ առաքելությունը պետք է լինի նաև ի շահ Ադրբեջանի: Նախարարն ասել է, որ մտադիր է նաև այցելել խաղաղապահ բրիգադին։