Ըստ Ալիևի՝ իրենք պետք է զինվեն, մենք էլ լուռ հետևենք․ ադրբեջանագետ

Ադրբեջանագետ Տաթևիկ Հայրապետյանը ֆեյսբուքյան իր էջում մեջբերել է Իլհամ Ալիևի՝ տարբեր ժամանակներում արված հայտարարությունները, որոնք վերաբերում են Ադրբեջանի ռազմականացման ծրագրերին․

«Ալիև,

06.09.2022

«Բացի ռազմատեխնիկական ոլորտում աշխարհի առաջատար պետությունների հետ համագործակցության զարգացումից, մեր երկիրը նաև մեծացնում է հնարավորությունները ազգային պաշտպանական արդյունաբերության ոլորտում։ Ներկայումս Ադրբեջանը սերտորեն համագործակցում է աշխարհի ավելի քան 50 երկրների առաջատար ընկերությունների հետ ավիացիայի, նավիգացիայի, սարքաշինության և այլ ուղղություններով, տարեցտարի ավելանում են մեր երկրի պաշտպանական արդյունաբերության ձեռնարկություններում արտադրանքի ծավալները։ Առաջիկա ժամանակահատվածում մենք ավելի ենք ամրապնդել Ադրբեջանի զինված ուժերը և մեր երկրի պաշտպանունակությունը՝ հատուկ ուշադրություն տալով ժամանակակից զենքի, ռազմական տեխնիկայի, զինամթերքի, թիկունքային գույքի և այլ նյութական միջոցների արտադրությանը»:

Ալիև,

12.04.2022

«Կարծում եմ տարածաշրջանում խաղաղություն հաստատելու համար պետք է վերջ տալ Հայաստանի զինմանը: Հայաստանը չունի զենք գնելու փող և երբեք չի ունեցել: Երկրորդ ղարաբաղյան պատերազմում մենք ոչնչացրել ենք 4-5 միլիարդ դոլարի Հայաստանի ռազմական տեխնիկա: Հարց է ծագում՝ որտեղի՞ց աղքատ երկրին այդքան փող: Եթե Հայաստանին նորից տրամադրվեն սպառազինվելու միջոցներ, մենք դա կհամարենք ոչ բարեկամական քայլ և համապատասխանաբար կգործենք»․

Ըստ ադրբեջանական տրամաբանության իրենք պետք է զինվեն, մենք էլ լուռ հետևենք...,- գրել է ադրբեջանագետը։