Իշխանի բնական վերարտադրության շրջանում դրական տեղաշարժ չկա

Այսօր՝ լրագրողների հետ հանդիպմանը, նախագահին առընթեր Սևանա լճի հիմնահարցերի հանձնաժողովի նախագահ Վլադիմիր Մովսիսյանը կատարեց Սևանա լճի ավազանի բնապահպանական միջոցառումների տարեկան ամփոփում։ Խոսելով դրական տեղաշարժերից՝ բանախոսը նշեց, որ այս տարի լճի մակարդակը բարձրացել է 3 մետր 72 սանտիմետրով, և մինչև 2030 թ.–ը լճի մակարդակը առաջադրված վեց մետրի հասցնելը համարում է իրական։ Տարեկան միջինը 43 սմ–ով բարձրացել է ջրի մակարդակը, 23 սմ–ով ավելին՝ նախորդ տարվա համեմատ, և երևույթը կրել է շարունակական բնույթ, ջրի մակարդակն ամեն տարի բարձրացել է։  Դրան, ըստ հանձնաժողովի նախագահի, նպաստել է նաև բաց թողնվող ոռոգման ջրի քանակի նվազեցումը։

Երեք տարվա ընթացքում շատ աշխատանքներ են կատարվել. մեկընդմիշտ օրակարգից հանվել է ոսկու գործարանի խնդիրը. գործարանն Արարատից Սոտք չի տեղափոխվելու։ Բանախոսի խոսքերով՝ մնում է մաքրիչ սարքի տեղադրումը, որ իրենց խնդիրն այդ բոլոր գործողությունները՝ հանքանյութերի մշակման, համապատասխանեցվեն «Սևանի մասին» օրենքին։ Ավազանի հինգ քաղաքներում կոյուղագծեր են կառուցվելու։

Դրական տեղաշարժեր են արձանագրված նաև ջրի մաքրության հարցում։ Ըստ Վ. Մովսիսյանի՝ Սևանի ջրի լուսաթափանցելիությունը հասել է 8-10 մետրի։ Կենսաբազմազանության առումով ևս դրական տեղաշարժ կա. իշխանի երկու տեսակ ձկների թվաքանակն էական աճ է ապրել, բայց դա վերաբերում է միայն արհեստական վերարտադրված ձկներին, իսկ բնական վերարտադրության շրջանում դրական տեղաշարժ չկա։ Հանձնաժողովի նախագահի խոսքերով, այդ պրոբլեմը լուծելու ուղղությամբ ևս քայլեր են ձեռնարկվում։