«Մեր քաղաքացիները գնաճի հետևանքով իրենց վիճակը չեն վատացրել». Գագիկ Մինասյան

«Մեկ շաբաթ առաջ հայտարարվեցին այս տարվա առաջին տասնմեկ ամիսների բյուջեի կատարողականի տվյալները։ Իսկ տարվա վերջին ամիսը մենք կեզրափակենք՝ գերազանցելով բյուջեի աճը», – այսօր «Փաստարկ» մամուլի ակումբում տեղի ունեցած ասուլիսի ժամանակ, ամփոփելով 2011– ի տնտեսական ձեռքբերումները, ասաց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը։

Նա նշեց, որ այս տարվա հարկային եկամուտները գերազանցում են 10% նախորդ տարվա եկամուտները, իսկ արդյունաբերության և գյուղատնտեսության բնագավառում ունենք 14%, շինարարության բնագավառում 20%, ծառայության բնագավառում 6% աճ։ Արտահանման տոկոսը կազմել է 30%՝ գերազանցելով ներմուծման տոկոսները, որն այս տարի կազմել է 10%։ Խոսելով գնաճից, նա նշեց, որ այն 4,8% աճ է գրանցել. «Այս թիվը բյուջեյով սահմանված ցուցանիշներին համապատասխան է», – նկատեց նա։

Նա նշեց, որ նախորդ տարվա հետ համեմատած այս տարի 30% աճ ունենք, և այս ամիսների ամփոփումը թույլ է տալիս ենթադրել, որ տնտեսությունը դուրս է գալիս զարգացման նոր փուլ։

«Գնաճին զուգահեռ Հայաստանում տեղի ունեցավ միջին աշխատավարձի 6% աճ. այսինքն մենք այնպես արեցինք, որ մեր գնաճն ավելի փոքր լինի, քան մեր միջին աշխատավարձը, մեր քաղաքացիները գնաճի հետևանքով իրենց վիճակը չեն վատացրել», – նշեց Գագիկ Մինասյանը։