2011 թվականի հունվար-նոյեմբեր ամիսներին «Հարավկովկասյան երկաթուղի» ՓԲԸ բեռնափոխադրումների ծավալը կազմել է 2 մլն 981 հազար տոննա բեռ

ՀՀ տրանսպորտի եւ կապի նախարար Մանուկ Վարդանյանը դեկտեմբերի 28-ին ներկա է գտնվել «Հարավկովկասյան երկաթուղի» ՓԲԸ-ի տարվա ամփոփմանը, որը ներկայացրել է ընկերության գլխավոր տնօրեն Շեւքեթ Շայդուլլինը:

Նախարար Մ.Վարդանյանը նշել է, որ 2011 թվականը արդյունավետ տարի էր երկաթուղային տրանսպորտի` մեր երկրի տնտեսության կայուն զարգացման կարևորագույն ճյուղերից մեկի համար եւ, որ անցնող տարում հաջողությամբ շարունակվել են ավելի քան 3 տարի առաջ հայկական երկաթուղին կոնցեսիոն կառավարման հանձնելուց հետո ոլորտի բարեփոխումներին ուղղված աշխատանքները: «Զգալի ներդրումներ են կատարվել Հայաստանի Հանրապետության երկաթուղային ենթակառուցվածքների զարգացման, փոխադրումների ծավալների և արագության մեծացման, գնացքների երթևեկության անվտանգության բարձրացման ուղղությամբ»,- ասել է Մ.Վարդանյանը:

Նախարարը «Հարավկովկասյան երկաթուղի» ընկերության իրականացրած կարևորագույն աշխատանքների թվում առանձնացրել է ընկերության մասնակցությունը Վանաձոր-Ֆիոլետովո նոր երկաթուղագծի նախագծման և կառուցման նախապատրաստական աշխատանքներին, ընկերությունում Տրանսպորտային ծառայությունների կենտրոնի բացումը, միջազգային հաղորդակցության ուղևորագնացքների տոմսերի վաճառքի ավտոմատացված համակարգի ներդնումը:

Մ.Վարդանյանը ներկաներին տեղեկացրել է, որ ՀՀ տրանսպորտի և կապի նախարարությունը, լինելով հայկական երկաթուղու կառավարման լիազոր մարմին, իր հերթին ակտիվորեն իրականացնում է երկաթուղու ոլորտը կարգավորող օրենսդրական աշխատանքներ և աջակցում ընկերությանը երկաթուղային ծրագրերի իրականացման հարցում:

Միջոցառման վերջում «Հարավկովկասյան երկաթուղի» ընկերության վեց աշխատակիցներ պարգեւատրվել են ՀՀ տրանսպորտի եւ կապի նախարարի հուշամեդալով եւ պատվոգրերով:

«Հարավկովկասյան երկաթուղի» ՓԲԸ-ն անցնող տարվա ընթացքում իրականացրել է իր առջեւ դրված բոլոր գերական խնդիրները: «Արմենպրես»-ի տեղեկացմամբ, դեկտեմբերի 28-ին, ամփոփելով անցնող տարին, նման հայտարարությամբ հանդես եկավ ընկերության գլխավոր տնօրեն Շեւքեթ Շայդուլինը: Նրա խոսքով՝ զարգացման ու արդիականացման քաղաքականությունը շարունակվելու է նաեւ 2012 թվականին, որի համար արդեն հաստատվել է ներդրումային ծրագիր՝ 1 միլիարդ 150 մլն ռուբլու չափով գումար:

«Այդ գումարը թույլ է տալիս կատարել 2008-2012 թթ. ընկերության ներդրումային ծրագիրը՝ 100,4 տոկոսով»,- նշեց Շայդուլինը:

Ամփոփելով անցնող տարվա արդյունքները՝ ընկերության գլխավոր տնօրենը նշեց, որ 2011 թվականի հունվար-նոյեմբեր ամիսներին «Հարավկովկասյան երկաթուղի» ՓԲԸ բեռնափոխադրումների ծավալը կազմել է 2 մլն 981 հազար տոննա բեռ, ինչը 6,3 տոկոսով գերազանցում է 2010 թվականի նույն ժամանակահատվածի ցուցանիշը: Միաժամանակ 2011 թվականի 11 ամիսների ընթացքում «ՀԿԵ» բեռնափոխադրումների փաստացի ցուցանիշը 7,6 տոկոսով գերազանցել է նախատեսված ծավալը:

«Հարավկովկասյան երկաթուղի» ՓԲԸ միջազգային ուղեւորափոխադրումների ծավալները 2011 թվականի հունվար-նոյեմբեր ամիսների արդյունքները նույնպես աճ են արձանագրել 5,4 տոկոսով»,- ասաց Շայդուլինը՝ ընդգծելով, որ այդ ընթացքում փոխադրվել ե ավելի քան 54,5 հազար ուղեւոր:

«Հարավկովկասյան երկաթուղի» ՓԲԸ-ի տարվա ամփոփման հանդիպմանը ներկա էր նաեւ ՀՀ տրանսպորտի եւ կապի նախարար Մանուկ Վարդանյանը: