Վայոց Ձորում զարգացել է գյուղատնտեսությունը

«Վայոց ձորի մարզում այս տարի արտադրվել է 3 հազար 337 տոննա պտուղ ու հատապտուղ, կես տոննա հացահատիկ, բանջարեղեն ու խաղող», – այսօր «Փաստարկ» մամուլի ակումբում տեղի ունեցած ասուլիսի ժամանակ հայտարարեց Վայոց Ձորի մարզպետ Սերգեյ Բագրատյանը: Նա նշեց, որ այս տարի նախորդ տարվա համեմատ մարզում արձանագրվել է ՀՆԱ-ի 15 տոկոս աճ:

«Վայոց ձորում զգալի աշխատանքներ են իրականացվել Գյուղատնտեսության զարգացման միջազգային հիմնադրամի կողմից. մարզի 8 գյուղերում 5 տարվա ներդրումների արդյունքում զարգանալու է արտադրական պտղաբուծությունը, ինչից հետո մարզի արտադրանքը մրցունակ կլինի եվրոպական երկրների շուկաներում»,– տեղեկացրեց Սերգեյ Բագրատյանը:

Նրա խոսքերով՝ համագործակցություն է սկսվելու Իրանի Խոյ նահանգի հետ մսի ու բրդի իրացումն Իրանում կազմակերպելու առումով: ԸՆդ որում` իրանական կողմն է մարզին տրամադրելու տոհմային անասնագլխաքանակ՝ տեղում բազմացնելու համար։

Մարզպետը նշեց, որ Իրանի հետ համագործակցության կարեւոր ծրագրերից է նաեւ Եղեգնաձորի պահածոների գործարանը վերագործարկելու նպատակով կատարվող ուսումնասիրությունները, ինչի արդյունքում մոտավորապես 70 աշխատատեղ է ստեղծվելու. «Ծրագիրը կյանքի է կոչվելու համաֆինանսավորմամբ, որից 250 հազար ԱՄՆ դոլարը կտրամադրի իրանական կողմը, իսկ 400 հազարը` ՀՀ կառավարությունը»,– նշեց նա։

Վայոց Ձորում փոքր ՀԷԿ-երի կառուցման մասին խոսելիս Սերգեյ Բագրատյանը նշեց, որ ներկայում 40 ՓՀԷԿ-երի թույլտվություն է տրվել, որոնցից 14-ն արդեն կառուցվել են: