Հավաքվել ենք այստեղ՝ ասելու, որ ԱԳՆ շենքում 2018 թվականից ընդմիջում է․ Հենրիխ Դանիելյան

Այս պահին ԱԳՆ շենքի մոտ տեղի է ունենում ՀՀԿ երիտասարդական և ուսանողական կազմակերպությունների անդամների բողոքի ակցիան։ 

ՀՀԿ երիտասարդական կազմակերպության ղեկավար Հենրիխ Դանիելյանն իր խոսքում մանրամասն ներկայացրեց ակցիայի անցկացման նպատակները․

«Հավաքվել ենք այստեղ՝ ասելու, որ այս շենքում 2018 թվականից ի վեր ընդմիջում է։ Դուք ոչնչով չեք զբաղվում, որպեսզի քայլեր ձեռնարկեք, որ Արցախի ռազմաքաղաքական ղեկավարությունը, որը ձեր վարած քաղաքականության արդյունքում հայտնվել է Բաքվի բանտերում, վերադառնան հայրենիք։

Ձեր վարած քաղաքականության արդյունքում է այսօր Արցախը հայաթափվել։ Դուք 2018-ից ՀՀ քաղաքացու հաշվին զբաղվում եք վճարովի տուրիզմով, այս շենքը սարքել եք տուրիստական գործակալություն․ այն հարկերը, որ ՀՀ քաղաքացիները վճարում են, որպեսզի այս շենքում աշխատեն ի նպաստ Հայաստանի և Արցախի, հարց է առաջանում՝ դուք աշխատում եք ի նպաստ ՀՀ և Արցախի, թե՞ Ադրբեջանի և նրանց քաղաքացիների շահերի»,- իր ելույթում նման տեսակետ արտահայտեց Դանիելյանն ու որպես հավելում շեշտեց՝ այժմյան իշխանությունները միակն են, որ ասում են՝ Արցախը Ադրբեջան է։

Ըստ նրա՝ ներկայիս իշխանությունների վարած քաղաքականության արդյունքում Հայաստանը հայտնվել է այն իրավիճակում, որում հայտնվել էր Արցախը․

«Հայաստանի ԱԳՆ-ի և Թուրքիայի ու Ադրբեջանի ապագայի մասին տեսլականները միանման են։ Անգամ ԱԳՆ-ի կայքից հեռացրել եք Արցախի մասին բոլոր հիշատակումները։ Եվ մենք այստեղ ենք ասելու, որ դուք չե՛ք ներկայացնում ՀՀ քաղաքացուն, դուք ներկայացնում եք ձեր սեփական նեղ անձնական շահերը։ Ձեր ապագան ոչ մի ընդհանուր առնչություն չունի Հայաստանի և հայկական Արցախի ապագայի հետ»,- ընդգծեց նա իր խոսքի ավարտին։