36 տարի առաջ այս հրապարակը լեփ-լեցուն էր, հայ ժողովուրդը անվախ ու համարձակ էր․ Ժասմինա Ղևոնդյան

Այս պահին Ազատության հրապարակում ՀՀ վարչապետ Նիկոլ Փաշինյանի հրաժարականի պահանջով հանրահավաք է տեղի ունենում։

«Միասին այլընտրանքային հասարակական-քաղաքական շարժման» խորհրդի անդամ Ժասմինա Ղևոնդյանը իր ելույթում ներկայացրեց հանրահավաքի ընթացքում քաղաքացիներին բաժանվող գրքույկների հիմնական բովանդակությունը։ Դրանցում զետեղված են 100 հիմնավորումներ, թե ինչու պետք է Նիկոլ Փաշինյանը հրաժարական ներկայացնի․

«Այսօր հայ ժողովրդի զարթոնքի և նվաճումների հիմնադրման օրն է, որը բազում փորձությունների, տառապանքների, բազմահազար կյանքերի գնով մեզ հաղթանակ պարգևեց, բայց 32 տարի անց մեկ մարդու կամքով այս օրը ու բազում այլ օրեր վերածվեցին սգո օրերի։

36 տարի առաջ այս հրապարակը լեփ-լեցուն էր, հայ ժողովուրդը խանդավառված, անվախ ու համարձակ էր, և այդ համարձակությունը բռնապետական համարվող Խորհրդային միությունում էր։ Իսկ այսօր ժողովրդավարական Հայաստանում նախարարությունների աշխատակիցները վախենում են այս գրքույկները վերցնել, որոնցում 100 պատճառներն են Նիկոլին անվստահություն հայտնելու համար»,- այս մասին իր խոսքում հայտնեց Ղևոնդյանը՝ հավելելով, որ գրքույկում առկա են նաև Փաշինյանի հայտնի մտքերն ու դիրքորոշումը սկսած 1998 թվականից։