«2012–ին կենսաթոշակների ու նպաստների չափն ավելանալու է». Արթուր Գրիգորյան

«2012 թ. հունվարից պետական կենսաթոշակների չափն ավելանալու է», – այս մասին կառավարության նիստից հետո լրագրողներին տեղեկացրեց ՀՀ աշխատանքի և սոցիալական հարցերի նախարար Արթուր Գրիգորյանը։

Նա նշեց, որ հիմնական կենսաթոշակի չափը 10,500 դրամի փոխարեն կդառնա 13 հազար դրամ, ըստ այդմ աշխատանքային կենսաթոշակի միջին չափը 28,700-ի փոխարեն կկազմի 31,300 դրամ, սոցիալական կենսաթոշակի չափը 13,200-ի փոխարեն՝ 16,500 դրամ: Շարքային կազմի զինծառայողներին տրվող հաշմանդամության միջին չափը 17,800 դրամի փոխարեն կկազմի 20,900 դրամ, աճը՝ շուրջ 24%:

Արթուր Գրիգորյանը տեղեկացրեց, որ նպաստների բազային միջին չափը նույնպես բարձրացել է՝ 13,500 դրամից 16,000 դրամ, ինչի արդյունքում միջին ամսական նպաստը 26,850 դրամից կդառնա 29,350 դրամ:

Նա նշեց, որ կենսաթոշակների չափերի բարձրացման հետևանքով ընտանեկան նպաստների համակարգում ներառված կենսաթոշակառուները չեն զրկվելու նպաստից, արդյունքում ավելի շատ աղքատ ընտանիքներ կընդգրկվեն նպաստների համակարգում:

«Հաջորդ տարի կենսաթոշակառուների վիճակը ինչ-որ չափով կբարելավվի, սակայն կենսաթոշակների չափը դեռևս բավարար չէ, որպեսզի հայտարարենք, թե կենսաթոշակառուին վճարում ենք բավարար չափով կենսաթոշակ»,- շեշտադրեց նախարարը:

Նշենք նաև, որ, ինչպես արդեն տեղեկացրել է ԼՈՒՐԵՐ.com-ը, այսօր՝ կառավարության նիստում արդեն իսկ որոշում է ընդունվել 2012 թ.–ի հունվարից կենսաթոշակի բաշխումը նոր չափաբաժնով իրականացնելու մասին որոշումը։