Փոփոխություններ «Հայաստանի ավտոապահովագրողների բյուրո» ԻԱՄ-ի կանոններում

ՀՀ կենտրոնական բանկի կողմից 21.12.2011թ.-ին գրանցվել են «Հայաստանի ավտոապահովագրողների բյուրո» ԻԱՄ-ի կողմից հաստատված հետևյալ կանոնները և կանոններում կատարված փոփոխությունները.

1. 2012 թվականի համար ԱՊՊԱ ոլորտում հիմնական և բազային ապահովագրավճարների նվազագույն և առավելագույն սահմանաչափերի և ռիսկային գործակիցների թույլատրելի արժեքների չափը սահմանող կանոններ (RL1-009),

2. ԱՊՊԱ ոլորտում ապահովագրական ընկերությունների կողմից ապահովագրական հատուցումների վճարման կանոններում կատարված փոփոխություն (RL1-017),

3. «Հայաստանի ավտոապահովագրողների բյուրո» ԻԱՄ կողմից երաշխավորման ֆոնդի միջոցների հաշվին հատուցումների վճարման կանոններում կատարված փոփոխություն (RL 1-018),

4. ԱՊՊԱ պայմանագրերով ապահովագրական գումարի միասնական չափը սահմանող կանոններ (RL 1-037):

Մասնավորապես, ապահովագրական ընկերություններն իրենց կողմից կնքված ԱՊՊԱ պայմանագրերում նշված յուրաքանչյուր ավտոտրանսպորտային միջոցով պատճառված վնասի գծով ապահովագրական հատուցում տրամադրելիս օրենքով և Բյուրոյի կանոններով սահմանված կարգով կիրառում են ապահովագրական գումարի հետևյալ չափերը (անկախ ԱՊՊԱ վկայագրում այլ չափեր նշված լինելու հանգամանքից)՝

1) անձնական վնասների համար՝ 3 300 000 ՀՀ դրամ՝ ըստ յուրաքանչյուր տուժողի (նախկին 3 000 000դր-ի փոխարեն), և 10 000 000 ՀՀ դրամ՝ ըստ յուրաքանչյուր ապահովագրական պատահարի (նախկին 9 000 000դր-ի փոխարեն).

2) գույքին պատճառված վնասների համար՝ 1 800 000 ՀՀ դրամ՝ ըստ յուրաքանչյուր ապահովագրական պատահարի    (նախկին         1 500 000դր-ի փոխարեն):

Ինչպես նաև, Տուժողի հուղարկավորության հետ կապված ծախսերը հատուցվում են օրինական ուժի մեջ մտած դատական ակտով սահմանված չափով, իսկ քաղաքացիական, քրեական կամ դատական կարգով վարչական գործ հարուցված չլինելու կամ այդպիսի գործով կայացված դատական ակտով տուժողի հուղարկավորության հետ կապված ծախսերի հատուցման հետ կապված հարցերը կարգավորված չլինելու դեպքում, տուժողի հուղարկավորության հետ կապված ծախսերը գնահատվում են 1 000 000 ՀՀ դրամ (նախկին 650 000դր-ի փոխարեն), որը հատուցվում է միանվագ կերպով։

Նշենք, որ կանոնները և դրանցում կատարված փոփոխություններն ուժի մեջ են մտնելու 2012 թ.-ի հունվարի 1-ից: