Դու՛ ես Արցախն իջեցրել մահվան մահիճ, իսկ հիմա մեղադրում ես, թե ինչու վերջում ինչ-որ մեկն անջատեց արհեստական շնչառության սարքը․ Նարեկ Գալստյան

Քաղաքական գործիչ, լրագրող Նարեկ Գալստյանը  գրում է․

Որ չի ասում, թե ես չեմ լուծարել Լեռնային Ղարաբաղը (Արցախ ասելու համար кишка тонка). 

1. Դու՛ ես մերժել պատերազմը կանխելու միակ հնարավոր առաջարկը՝ արված ԵԱՀԿ Մինսկի խմբի համանախագահ Պոպովի կողմից դեռևս 2019 թ-ին՝ բոլորին ասելով, թե նոր փաստաթուղթ չենք ստացել:

2. Դու՛ ես բանակցային գործընթացում սարքել մի շիլաշփոթ, որից հետո միջնորդները ձեռքերը լվացել ու Ալիևին հարձակման կանաչ լույս են տվել:

3. Պատերազմի օրերին դու՛ ես մերժել առնվազն հոկտեմբերին հրադադար կնքելու հնարավորությունն այն պահին, երբ դեռ անգամ Հադրութն ընկած չէր: 

4. 2020-ի նոյեմբերի 9-ի վատ, բայց միակ հասանելի փաստաթղթի 9-րդ կետ կոչեցյալը դու՛ ես ստորագրել:

5. Դու՛ ես առանց մի կրակոցի հանձնել Քելբաջարը, Լաչինը, Կուբաթլուի մի մասն այն պայմաններում, երբ Ադրբեջանը չէր կատարել իր պարտականությունները, կային տասնյակ ու հարյուրավոր գերիներ:

6. Դու՛ ես եռակողմ հարթակից թռել դեպի արևմտյան՝ Պրահայում ճանաչելով Արցախն Ադրբեջանի կազմում:

7. Դու՛ ես տվել Գորիս-Կապան մայրուղին ու ոչինչ չես արել Լաչինի ապաշրջափակման համար՝ մտածելով, թե այս կերպ օրակարգից կհանես «միջանցքի հարցը»:

8. Դու՛ ես Արցախին միայնակ թողել՝ մտածելով, թե եթե երկիրն ընկնի, ապա Ադրբեջանն ու ՌԴ-ն ազդեցության այլ մեխանիզմներ չեն ունենա Հայաստանի վրա՝ հանձնելով քո զավակին ու դրանով Հայաստանը դարձնելով ավելի խոցելի: 

9. Դու՛ ես Արցախն իջեցրել մահվան մահիճ, իսկ հիմա մեղադրում ես, թե ինչու վերջում ինչ-որ մեկն անջատեց արհեստական շնչառության սարքը: