Եթե Հայաստանը ցանկանում է ուղիղ բանակցել Ադրբեջանի հետ, ի սեր Աստծո, թող բանակցի. Լավրով

ՌԴ ԱԳ նախարար Սերգեյ Լավրովը հայտարարել է, որ եթե Հայաստանի իշխանությունները ցանկանում են ուղիղ բանակցություններ Ադրբեջանի հետ՝ առանց Ռուսաստանի մասնակցության, «ի սեր Աստծո» թող բանակցեն։ Նրա խոսքերը մեջբերում է ՏԱՍՍ-ը։

Դիվանագետի խոսքով՝ Մոսկվան անհանգստացած է, որ 2020-2022 թվականներին Ռուսաստանի, Հայաստանի և Ադրբեջանի մի քանի գագաթնաժողովներում կնքված եռակողմ համաձայնագրերը «խաթարվել են»։ Այնուհետև կողմերը խոսել են տրանսպորտային կապի վերականգնման և եռակողմ հանձնաժողովի ստեղծման մասին։

«Երևանում կարծում են, որ դա պետք է արվի ուղղակիորեն Ադրբեջանի հետ, բայց եթե դա հաջողվի, ի սեր Աստծո, թող այդպես լինի»,- ասել է ՌԴ ԱԳՆ ղեկավարը։

Լավրովը հայտարարել է՝ պետական ​​սահմանի սահմանազատման հարցում Հայաստանը չի ցանկանում ներգրավել Ռուսաստանին, բայց, միևնույն ժամանակ, անընդհատ ձգտում է ներգրավել Արևմուտքին՝ ԱՄՆ-ին, Եվրամիությանը։ Նախարարի խոսքով՝ սա Երևանի ընտրությունն է, բայց պետք է բանակցել առաջին հերթին ադրբեջանցի հարևանների հետ, այլ ճանապարհ չկա։

Օգոստոսի 31-ին ՀՀ վարչապետ Նիկոլ Փաշինյանը մամուլի ասուլիսի ժամանակ ասաց, որ Հայաստանն այս փուլում նախընտրում է Ադրբեջանի հետ ուղիղ բանակցությունները՝ երկկողմ ձևաչափով։ Նա պարզաբանել է, որ այս մասին հայտնել է ՌԴ նախագահ Վլադիմիր Պուտինին իր հետ վերջին հեռախոսազրույցի ժամանակ։