Մեզ փորձում են հասկացնել, որ ԱՄՆ-ն և ՆԱՏՕ-ն պատրաստ են ամեն ինչի. Լավրով

Ուկրաինային F-16 կործանիչների մատակարարումը ՆԱՏՕ-ի կողմից դիտավորյալ ազդանշան կլինի Ռուսաստանին միջուկային ոլորտում, մայիսի 30-ին հայտարարել է ՌԴ ԱԳ նախարար Սերգեյ Լավրովը։

«F-16 կործանիչները երկար ժամանակ եղել են ՆԱՏՕ-ի, այսպես կոչված, համատեղ միջուկային առաքելությունների հիմնական մասը: Ուստի, մենք չենք կարող չդիտարկել այդ համակարգերի մատակարարումը Կիևի ռեժիմին՝ որպես ՆԱՏՕ-ի կանխամտածված ազդանշանային գործողություն միջուկային ոլորտում։ Նրանք փորձում են մեզ հասկացնել, որ Ուկրաինայում ԱՄՆ-ն ու ՆԱՏՕ-ն պատրաստ են բառացիորեն ամեն ինչի»,- ասել է նա ՌԻԱ Նովոստիին տված հարցազրույցում։

Լավրովը հավելել է, որ F-16 կործանիչները չեն փոխի իրավիճակը մարտադաշտում։ Ռուս զինվորականները կոչնչացնեն այս տեխնիկան այնպես, ինչպես Արևմուտքի կողմից Կիևին մատակարարվող ցանկացած այլ տեխնիկա։ ՌԴ ԱԳՆ ղեկավարը հույս է հայտնել, որ ոչ ռազմավարական միջուկային զենքով ռուս-բելառուսական զորավարժությունները կկարողանան խելքի բերել արևմտյան երկրներին և պաշտպանել նրանց չմտածված գործողություններից։