Արմավիրում «Ford Fusion»-ը գլխիվայր հայտնվել է դաշտում․ կա 1 զոհ, 4 վիրավորներից մեկն անչափահաս է

Այսօր՝ մայիսի 28-ին, խոշոր ու ողբերգական ավտովթար է տեղի ունեցել Արմավիրի մարզում։ Ժամը 03։50-ի սահմաններում Արմավիրի մարզի բնակիչ 29-ամյա Դավիթ Կարապետյանը իր վարած «Ford Fusion» մակնիշի ավտոմեքենայով Տարոնիկ-Ակնալիճ ավտոճանապարհին՝ Տարոնիկի վարչական տարածքում, դուրս է եկել հանդիպակաց երթևեկելի գոտի, բախվել հողաթմբին և, մոտ 100 մ առաջ ընթանալով, գլխիվայր շրջվելով հայտնվել դաշտում։

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով ուղևորներ, Արմավիրի մարզի բնակիչներ 15-ամյա Լեռնիկ Ա․-ն, 18-ամյա Արամ Խաչատրյանը և 18-ամյա Հայկ Տերտերյանը մարմնական վնասվածքներով տեղափոխվել են «Վաղարշապատ» բժշկական կենտրոն, իսկ մյուս ուղևոր, Արմավիրի մարզի բնակիչ 53-ամյա Ալեքսան Գեղամյանը տեղում մահացել է։

Օպերատիվորեն դեպքի վայր են ժամանել ՀՀ Ներքին գործերի նախարարության փրկարար ծառայության Վաղարշապատի հրշեջ փրկարարական ջոկատից՝ 1 մարտական հաշվարկ։