Մարինե Կպրյանը կարծում է, որ զբոսաշրջության զարգացմանը խոչընդոտող հիմնական խնդիրը հյուրանոցների պակասն է

Այսօր՝ հունվարի 11-ին՝ լրագրողների հետ հանդիպմանը, Տուրօպերատորների ասոցիացիայի հիմնադիր անդամ Մարինե Կպրյանը, խոսելով Հայաստանում տուրիզմի աճը խոչընդոտող խնդիրների մասին, առաջինների շարքում մատնանշեց հյուրանոցների պակասը։ Հյուրանոցների թվի պակասին, ըստ բանախոսի, ավելանում է նաև առաջարկվող ծառայությունների թանկության և մի քանի այլ ֆինանսական խնդիրներ։ Մ. Կպրյանի խոսքերով՝ Հայաստանը հարևան երկրների համեմատությամբ էլ է համարվում թանկ երկիր։ Օրինակ՝ Վրաստանի

Լուսանկարը` 7or.am-ի։                                                             դեպքում դրան նպաստում է վիզային վճարումների վերացումը, իսկ Հայաստանում դրանք դեռ պահպանվում են։ Խնդիրների շարքում նշվեց նաև տոմսերի թանկությունը, ինչից, ըստ նրա, իրենց դիմող մարդկանցից շատերն են բողոքում։ Բացի այդ Հայաստանի հյուրանոցային ծառայությունները հիմնականում գովազդվում են տուրիստական ընկերությունների կողմից, իսկ կառավարության աջակցությունը գերակա հայտարարված ճյուղի զարգացմանը, այս առումով քիչ է։ Նա կարծում է, որ սրանք են այն խնդիրները, որոնք խոչնդոտում են այս ճյուղին՝ սպասված արդյունքներ ապահովելու առումով։

Ասուլիսի մյուս բանախոս, Հայաստանի հյուրանոցների ասոցիացիայի նախագահ Հակոբ Հակոբյանը, համաձայնեց այն դրույթին, որ գերակա հայտարարված ճյուղի համար գրանցված 10-15% աճը շատ քիչ է, մանավանդ եթե հաշվի առնենք այն փաստը, որ, նրա խոսքերով, սկսած 2001թ.-ից՝  նախորդ տարվա համեմատ գրանցվում է զբոսաշրջության աճի այդ (10-15% միջինացված) ցուցանիշը ։ «Մենք կակնկալեինք 30-35%-անոց աճ յուրաքանչյուր տարի, որպեսզի ասեինք՝ այս ճյուղը գերակա է։ Եվ, ի պատիվ մեր նախարարի, նա համաձայնեց, որ պետք է այդ կարգի աճի տեմպեր լինեն։ Ուղղակի խնդիրները բավականին շատ էին, որ մենք կարողանայինք այդ ռեժիմի մեջ մտնել», – պարզաբանեց նա։ Հ.Հակոբյանը նաև նշեց, որ այդ արդյունքներին հասնելու համար ավելի շատ գումար պետք է ծախսել, որը այսօր, ըստ նրա, պետությունը չունի։