Ֆրանսիացի կինը լքել է ամուսնուն՝ հանուն կեղծ Բրեդ Փիթի և կորցրել 830.000 եվրո

Ֆրանսուհի Էննը դարձել է Բրեդ Փիթ ներկայացած խարդախի զոհը։ Այս մասին հայտնում է HLN-ը։

53-ամյա Էննը պատմել է, որ սոցիալական ցանցերում օգտահաշիվ է բացել 2023 թվականին: Այդ ժամանակ էլ մի տղամարդ սկսել է իրեն գրել Փիթի անունից։ Սկզբում նա քաղաքավարի զրույցներ է ունեցել նրա հետ, սկսել սիրախաղ անել և նվերներ ուղարկել պայուսակների և զարդերի տեսքով։ Սակայն դրանք ստանալու համար կինը ստիպված է եղել վճարել ավելի քան 5000 եվրո՝ իբր մաքսայինի համար։

Էննը խոստովանել է, որ հիացած էր խաբեբայով։ Նրա խոսքով՝ տղամարդը գիտեր ինչպես խոսել կանանց հետ։ Նա նշել է, որ այն ժամանակ դժվար ժամանակաշրջան է ապրելիս եղել իր միլիոնատեր ամուսնու հետ և զգում էր, որ նա բավականաչափ ուշադրություն չի դարձնում իրեն։ Արդյունքում նա թողել է ամուսնուն կեղծ Բրեդ Փիթի համար։

Ինչպես նշել է Էննը, սկզբում կասկածներ ուներ, թե արդյոք իրականում խոսում է հոլիվուդյան աստղի հետ։ Սակայն նրան համոզել են արհեստական ​​ինտելեկտի միջոցով ստեղծված լուսանկարները։ Շուտով «Բրեդ Փիթը» հայտարարել է, որ ունի երիկամի քաղցկեղ և գումար է խնդրել բուժման համար։ Նա բացատրել է, որ ինքը չի կարող վճարել հիվանդանոցի ծախսերը, քանի որ իր հաշիվները «սառեցվել են Անջելինա Ջոլիի հետ ամուսնալուծության գործընթացի պատճառով»։ Կինը մի քանի անգամ հազարավոր եվրոներ է ուղարկել խարդախին «ձախողված վիրահատությունների» պատճառով։ Ընդհանուր առմամբ, նա տվել է 830 հազար եվրո։

Էննը պատմել է, որ այդ ընթացքում ոչ միայն լքել է ամուսնուն, այլև վեճ է ունեցել դստեր հետ, կորցրել է բազմաթիվ ընկերների և հոսպիտալացվել է դեպրեսիայի պատճառով։ Նա միայն այն ժամանակ է հասկացել, որ դարձել է խաբեբայի զոհ, երբ տեսել է Փիթի և Ինես Դե Ռամոնի սիրավեպի մասին տեղեկությունը: