ԱՄՆ նախագահ Ջո Բայդենը ամփոփել է իր քաղաքական կարիերան (տեսանյութ)

ԱՄՆ ներկայիս նախագահ Ջո Բայդենը հայտարարել է՝ այս պահին Ամերիկայում օլիգարխիա է սկսում ի հայտ գալ, որը վտանգ է ներկայացնում ժողովրդավարության համար։ Այդ մասին նա հայտարարել է հունվարի 15-ին իր հրաժեշտի ելույթի ժամանակ։

«Այսօր Ամերիկայում ի հայտ է գալիս ծայրահեղ հարստության, իշխանության և ազդեցության օլիգարխիա, որը բառացիորեն սպառնում է մեր ողջ ժողովրդավարությանը, մեր հիմնական իրավունքներին և ազատություններին և բոլորի համար հաջողության հասնելու արդար հնարավորություններին», - Բայդենի խոսքերը մեջբերում է The New York Times-ը:

Նա հայտարարել է, որ իրեն անհանգստացնում է իշխանության վտանգավոր կենտրոնացումը շատ քիչ գերհարուստ մարդկանց ձեռքում: Նա նշել է, որ վտանգավոր հետևանքներ կարող են առաջանալ, եթե իշխանության չարաշահումը մնա անպատիժ։

Բայդենը նաև կոչ է արել բարեփոխել հարկային օրենսգիրքը, որպեսզի միլիարդատերերը վճարեն «իրենց արդար բաժինը»՝ առանց մեծ հարկային արտոնությունների՝ վերացնելով քարոզարշավի թաքնված ֆինանսավորումը և արգելել Կոնգրեսի անդամներին առևտուր անել բաժնետոմսերով, քանի դեռ նրանք Կոնգրեսում են:

«Մենք պետք է ներմուծենք ամենաուժեղ էթիկայի բարեփոխումները մեր Գերագույն դատարանի համար: Մենք պետք է բարեփոխենք Սահմանադրությունը, որպեսզի պարզ լինի, որ ոչ մի նախագահ պաշտպանված չէ այն հանցագործություններից, որոնք նա կատարել է պաշտոնավարման ընթացքում»,- ընդգծել է նա: