Ալիևի ռեժիմի համար մենք բոլորս ահաբեկիչներ ենք․ պետք է ստիպենք ՀՀ իշխանություններին տեղներից շարժվել․ Արտակ Բեգլարյան

Մեր հայ պատանդները Բաքվում են մեզ համար: Այս մասին ՄԱԿ-ի հայաստանյան գրասենյակի մոտ լրագրողներին ասաց Արցախի նախկին պետնախարար Արտակ Բեգլարյանը։

Նա նշեց, որ նրանք այնտեղ շինծու դատավարության առաջ են կանգնում, խոշտանգվում են, անմարդկային վերաբերմունքի են արժանանում, որովհետև ներկայացնում են մեզ՝ նախ որպես ԱՀ նախկին և գործող ղեկավարներ, երկրորդը՝ որպես հայեր, բոլորը, ոչ միայն ռազմաքաղաքական ղեկավարությունը։

«Այն անձինք, ովքեր կարծում են, որ Արցախը պետք է գոյություն ունենար, հիմա էլ գոյություն ունենա, Արցախը հայկական է, դա նշանակում է, որ Իլհամ Ալիևի ցեղասպանական ռեժիմի համար մենք բոլորս ահաբեկիչներ ենք: Եթե մենք ահաբեկիչներ ենք, ուրեմն ևս դատապարտվում ենք այնտեղ։ Դրա համար պետք է բոլորս ձայն բարձրացնենք բոլոր հնարավոր ատյաններում և առաջին հերթին ստիպենք, պահանջենք Հայաստանի իշխանություններին, որպեսզի տեղներից շարժվեն և առավելագույնը կատարեն մեր պատանդներին հայրենիք վերադարձնելու համար, մեզ մեր արժանապատվությունը վերադարձնելու համար»,- հայտարարեց Բեգլարյանը:

Նա նշեց, որ իրենք հավաքվել են ՄԱԿ-ի գրասենյակի առջև որպես միջազգային հանրության հավաքական դեմք և իրենց ակցիան ուղղված է ոչ միայն զուտ ՄԱԿ-ի կառույցներին, նաև բոլոր պետություններին, որովհետև բոլոր պետությունները ՄԱԿ անդամ են։

«Այնուհետև հավաքվելու ենք ԱԳՆ դիմաց, մեր խոսքն ուղղելու Հայաստանի իշխանություններին, որովհետև քանի դեռ մեր  պետական ինստիտուտները մեր իրավունքների պաշտպանությամբ չեն զբաղվում անհատական և հավաքական մակարդակով, բնականաբար, այլ պետություններն ընդհանրապես չեն զբաղվելու»,- ասաց Բեգլարյանը՝ նշելով, որ պետք է ստիպել ՀՀ իշխանություններին տեղներից շարժվել։