Ուղերձի բովանդակությունը ցանկալի չէ Ադրբեջանին․ կան պատժիչ կամ այլ բնույթի գործողությունների ռիսկեր․ Սիրանուշ Սահակյան (տեսանյութ)

Ռուբեն Վարդանյանի ուղերձը բացահայտում է, որպես հավելյալ աղբյուր, այն աղաղակող խախտումները, որոնք տեղի են ունեցել և ունենում Ադրբեջանում: Euromedia24-ի հետ զրույցում նման տեսակետ հայտնեց Մարդու իրավունքների եվրոպական դատարանում ռազմագերիների ներկայացուցիչ, Միջազգային եւ համեմատական իրավունքի կենտրոնի նախագահ Սիրանուշ Սահակյանը՝ անդրադառնալով Արցախի նախկին պետնախարար Ռուբեն Վարդանյանի՝ ադրբեջանական բանտից արված ուղերձին։ 

«Դա վկայություն է այն մասին, որ անձինք գտնվել են հարկադրանքի, կյանքին սպառնացող վտանգների, խոշտանգումների և այլ վատ վերաբերմունքի դրսևորումների ներքո և հարկադրաբար ստորագրություններ են դրել: Ընդ որում հարկադրանքը կիրառվել է ոչ միայն հայ պատանդների, այլև նրանց առնչությամբ մասնագիտական գործունեություն իրականացնող  անձանց հանդեպ, ինչպիսիք են փաստաբանները և թարգմանիչները։ Կա համընդհանուր պրակտիկա, որ ադրբեջանցի փաստաբանները սեփական անվտանգության նկատառումներից ելնելով հրաժարվում են հանձն առնել հայերի պաշտպանությունը։ Արդեն իսկ կան արձանագրված դեպքեր, երբ հանձն առած փաստաբանը դադարեցնում է իր գործունեությունը։ Սա նաև ապացույց է այն մասին, որ զրկված են պաշտպանություն կազմակերպելու հնարավորությունից և այդ հայտարարությունը համահունչ է հայրենադարձված գերիների վկայությունների հետ, երբ նրանց պարտադրել են ստորագրել թղթերի ներքո, որոնց բովանդակությունը կազմվել է ավելի ուշ փուլում և այդ բովանդակությանը գերիները ծանոթ չեն եղել: Ունենք վստահորդ, որի վրա վառելիք են լցրել և ստիպել են խոսել տեսախցիկի առջև` սպառնալով, որ կհրդեհեն, եթե թելադրված տեքստից շեղվող տեքստ արտաբերի»,- ասաց իրավապաշտպանը։ 

Ինչ վերաբերում է ենթադրություններին, թե հնարավոր է ուղերձը կեղծ է, ապա Սահակյանը այլ կարծիք հայտնեց․ «Տեղեկատվությունը կասկածի տակ դնելու խնդիր չունենք։ Նախ աղբյուրը ընտանիքն է, իսկ ընտանիքն այդ տեղեկությունը ստացել է հեռախոսազրույցի ընթացքում։ Կարծում եմ՝ Կարմիր խաչը ևս վերահաստատել է, որ նախորդող շաբաթների ընթացքում ապահովել է հեռախոսազանգեր հայ պատանդների և նրանց ընտանիքների միջև։ Իհարկե, հասկանալի է, որ ուղերձի բովանդակությունը ցանկալի չէ Ադրբեջանին և այդ առնչությամբ առկա են նաև պատժիչ կամ այլ բնույթի գործողությունների ռիսկեր, որի տակ գտնվում են բոլոր հայերը՝ անկախ ասված կամ չասված արտահայտություններից»,- նշեց Սիրանուշ Սահակյանը։ 

Նշենք, որ այսօր ժամը 15:00-ին Բաքվում մեկնարկել է Արցախի նախկին պաշտոնյաների գործով դատավարությունը։

Սոնա Հարությունյան