Իրանի Գերագույն դատարանի մոտ հրաձգություն է տեղի ունեցել. 2 դատավոր է սպանվել

Թեհրանում Իրանի Գերագույն դատարանի շենքի մոտ հրաձգություն է տեղի ունեցել, ինչի հետևանքով` երկու դատավոր է զոհվել, հայտնում է իրանական պետական ​​IRNA գործակալությունը։ Եվս մեկ դատավոր վիրավորվել է։ Հրաձիգը ինքնասպան է եղել։

Ինչպես հաղորդում է Tehran Times-ը, հրաձգությունը տեղի է ունեցել շաբաթ առավոտյան՝ տեղական ժամանակով մոտավորապես 10:45-ին (Երևանի ժամանակով՝ 11:15-ին): Իրանի արդարադատության մամուլի ծառայության հաղորդմամբ՝ զոհերը դատավորներ Ալի Ռազինին և Մոհամմադ Մոքիսեն են, ովքեր քննել են ազգային անվտանգության դեմ ուղղված հանցագործությունների, լրտեսության և ահաբեկչության գործերը։

«Ահաբեկչությունից անմիջապես հետո փորձ է արվել կալանավորել հրաձիգին, որն այնուհետև արագ ինքնասպանություն է գործել»,- հավելել են վարչությունից։ Ըստ հայտարարության, նախնական բացահայտումները ցույց են տալիս, որ հանցագործը նախկինում ներգրավված չի եղել Գերագույն դատարանի որևէ վարույթում: Հետաքննություն է սկսվել՝ պարզելու, թե ովքեր են կանգնած հարձակման հետևում։