ՄԻԵԴ–ը որոշել է, որ ամուսնու հետ սեքսից հրաժարված ֆրանսուհին ամուսնալուծության համար «մեղավոր չէ»

Ֆրանսիացի կինը, ով ավելի քան 10 տարի վիճարկում էր ամուսնուց բաժանվելու պատճառները, վերջապես շահել է դատը ՄԻԵԴ-ում։ Ստրասբուրգի դատարանը որոշել է, որ նրան չի կարելի մեղավոր համարել ամուսնության խզման համար, քանի որ հրաժարվել է ամուսնու հետ սեռական հարաբերությունից: Սա հենց այն հիմքն է, որը մատնանշել է ֆրանսիական դատարանը ամուսնալուծության գործընթացի ժամանակ իր վճռում, գրում է BBC–ն։

Մարդու իրավունքների եվրոպական դատարանի դատավորները միաձայն գտել են, որ ֆրանսիական արդարադատության համակարգը խախտել է հայցվորի՝ անձնական և ընտանեկան կյանքը հարգելու իրավունքները՝ համաձայն մարդու իրավունքների եվրոպական օրենսդրության։

Հայցվորը, որը հայտնի է որպես Հ.Վ. (այժմ՝ 69), ասել է, որ իր հաղթանակը քայլ առաջ էր ամուսնության շրջանակներում սեռական հարաբերությունների իրավական ասպեկտները վերասահմանելու հարցում:

Փաստաբան Լիլիա Միսսենի կարծիքով՝ ՄԻԵԴ որոշումը կօգնի վերացնել «ամուսնական պարտք» հնացած հասկացությունը։