ԱՄՆ և Վենեսուելան ամեն ինչ «սկսում են զրոյից»

Վենեսուելայի նախագահ Նիկոլաս Մադուրոն բարձր է գնահատել իր հանդիպումը ԱՄՆ նախագահ Դոնալդ Թրամփի հատուկ բանագնաց Ռիչարդ Գրենելի հետ և հույս է հայտնել, որ ԱՄՆ-ի հետ հարաբերություններում նոր սկիզբ կդրվի, փոխանցում է Venezolana de Television հեռուստաալիքը։ 

«Ես և Գրենելը անկեղծ, անմիջական, բաց և, կարելի է ասել, դրական խոսակցություն ունեցանք»,- ասել է Մադուրոն Venezolana de Television հեռուստաալիքի եթերում։ Նա նշել է, որ բանակցություններն անցել են հարգալից մթնոլորտում, և «որոշ թեմաներով առաջնային արդյունքներ ձեռք են բերվել»։

Նախագահը ցանկություն է հայտնել «նոր սկիզբ տալ ԱՄՆ-ի հետ պատմական հարաբերություններին»։ Վերջին տարիներին երկու երկրների միջև պայմանագրերի և համաձայնագրերի բացակայության պատճառով Մադուրոն առաջարկել է բանակցությունների «օրակարգը սկսել զրոյից»։

«Մենք երբեք չենք եղել ԱՄՆ-ի հակառակորդները, մենք հակաիմպերիալիստներ ենք և ցանկանում ենք հավասար աշխարհ՝ առանց կայսրությունների և հեգեմոնիայի»,- ընդգծել է նախագահը։ Նա կարծում է, որ ԱՄՆ-ի հետ հարաբերությունները պետք է կառուցվեն «Վենեսուելայի ինքնիշխանության, ժողովրդավարական կյանքի, միջազգային իրավունքի, Լատինական Ամերիկայի ու Կարիբյան տարածաշրջանի հարգանքի վրա»։

Մադուրոն ընդգծել է, որ «Վենեսուելայի հետ ԱՄՆ հարաբերություններում պետք է հաստատվի խաղաղություն, հարգանք և փոխըմբռնում»։ Նա նախագահ Թրամփին ասել է, որ ԱՄՆ-ի հետ հարաբերություններում «առաջին քայլն արված է»։