Մենք պետք է պատրաստվենք պատերազմի. ՆԱՏՕ-ի գլխավոր քարտուղար

ՆԱՏՕ-ի գլխավոր քարտուղար Մարկ Ռյուտեն Գերմանիային կոչ է արել էապես ավելացնել պաշտպանության հետ կապված ծախսերը և մեծացնել զենքի արտադրությունը: Գերմանիան պետք է «ավելի շատ ծախսի և ավելի շատ արտադրի», - ասել է Ռյուտեն Bild-ին տված հարցազրույցում, որը հրապարակվել է շաբաթ օրը՝ փետրվարի 1-ին, հաղորդում է DW–ն:

«Ակնհայտ է, որ առաջիկա ամիսներին այդ հարցը շատ եվրոպական երկրներում բանավեճի առարկա է դառնալու»,- ընդգծել է Հյուսիսատլանտյան դաշինքի գլխավոր քարտուղարը։ Նա իր կոչը, ի թիվս այլ բաների, բացատրել է Ռուսաստանի կողմից սպառնալիքով։ «Ես ձեզ հստակ ասում եմ՝ մենք պետք է պատրաստվենք պատերազմի: Սա (պաշտպանության հետ կապված ծախսերի ավելացումը - Խմբ.) պատերազմից խուսափելու լավագույն միջոցն է», - բացատրել է Ռյուտեն: Վտանգավոր է ոչ միայն Ռուսաստանի հետ կապված իրավիճակը, Չինաստանը նույնպես մեծացնում է իր ռազմական հնարավորությունները, նշել է նա։

ՆԱՏՕ-ի դաշնակիցները մոտակա ամիսներին կորոշեն, թե կոնկրետ որքան ներդրումներ կկատարեն պաշտպանության ոլորտում, ասել է Ռյուտեն: «Մի բանում կարող եմ ձեզ վստահեցնել՝ երկու տոկոսից շատ, ավելի շատ կլինի»,- պարզաբանել է նա։

ՆԱՏՕ-ի հաջորդ գագաթնաժողովը տեղի կունենա հունիսին Հաագայում։