50 մլն արժողությամբ մարզագույք է բաշխվել 19 մարզական կազմակերպությունների միջև

Հայաստանի Հանրապետության սպորտի և երիտասարդության հարցերի նախարարության կողմից ՀՀ կառավարության 2011 թվականի գերակա խնդիրների և գործունեության միջոցառումների ծրագրի իրականացման արդյունքների մասին

1. «Հայաստանի Հանրապետության մանկապատանեկան մարզադպրոցները, մարզաձևերի ազգային ֆեդերացիաները և այլ մարզական հասարակական կազմակերպություններ գույքով ապահովելու մասին» ՀՀ կառավարության որոշման նախագիծը ՀՀ կառավարություն ներկայացում

Որոշման նախագիծը 2011 թվականի օգոստոսի առաջին տասնօրյակում ներկայացվել է Հայաստանի Հանրապետության կառավարություն և հաստատվել է Հայաստանի Հանրապետության կառավարության 2011 թվականի օգոստոսի 18-ի N 1189-Ա որոշմամբ, որի հավելված N 1-ի համաձայն ձեռք է բերվել 50 մլն արժողությամբ 19 անվանում մարզագույք և բաշխվել 19 մարզական կազմակերպությունների միջև:

2. Ֆիզիկական կուլտուրայի և սպորտի զարգացման ֆինանսավորման հայեցակարգի մշակում

Ֆիզիկական կուլտուրայի և սպորտի զարգացման ֆինանսավորման հայեցակարգի մշակման համար ՀՀ էկոնոմիկայի նախարարության հետ ձեռք բերված պայմանավորվածության համաձայն ԵՄ տեխնիկական աջակցության «Թայեքս» (TAIEX) գործիքն օգտագործելու, մասնավորապես Եվրոպական հանձնաժողովի սպորտի վերաբերյալ «Սպիտակ փաստաթղթի» տնտեսական և սոցիալական մասերի ուսումնասիրման և փորձի փոխանակման նպատակով «Ֆիզիկական կուլտուրայի և սպորտի զարգացման ֆինանսավորում» թեմայով 2011 թվականի հոկտեմբերի 24-ին տեղի է ունեցել աշխատաժողով:

Հասարակական կազմակերպություններից, ՀՀ ֆինանսների և ՀՀ արդարադատության նախարարություններից ստացված առաջարկությունները քննարկելով և դրանք մասնակիորեն ներառելով՝ ՀՀ սպորտի և երիտասարդության հարցերի նախարարությունը «Հայաստանի Հանրապետության պետական բյուջեից մարզական ֆինանսական աջակցության հատկացման հայեցակարգը հաստատելու մասին» Հայաստանի Հանրապետության կառավարության որոշման նախագիծը ներկայացրել է ՀՀ կառավարություն։

3. ՀՀ Նախագահի մրցանակի համար «Լավագույն մարզական ընտանիք» մրցույթի անցկացում

2011 թ. հունիս-սեպտեմբեր ամիսներին անցկացվել է (արդեն 5-րդ անգամ) ՀՀ Նախագահի մրցանակի համար «Լավագույն մարզական ընտանիք» մրցույթը, որին մասնակցել են 1122 ընտանիքներ։

Մրցույթն անցկացվել է երեք փուլով, երեք տարիքային խմբերով Հայաստանի Հանրապետության 42 քաղաքային և գյուղական համայնքներում, Երևան քաղաքի 12 վարչական շրջաններում և Լեռնային Ղարաբաղի Հանրապետության Ստեփանակերտ քաղաքում և 5 շրջաններում:

Միջոցառման մրցանակակիրները պարգևատրվել են դրամական պարգևներով, մասնակից բոլոր երեխաները՝ մարզահագուստով, թանկարժեք հուշանվերներով:

4. Հայաստանի Հանրապետությունում երիտասարդական պետական քաղաքականության զարգացման ուղղությամբ առաջարկությունների ներկայացման նպատակով Հայաստանի Հանրապետության երիտասարդության շրջանում համապարփակ ուսումնասիրությունների իրականացման շրջանակներում Հայաստանի երիտասարդության ազգային զեկույցի մշակում

Համաձայն Հայաստանի Հանրապետության սպորտի և երիտասարդության հարցերի նախարարի 2011 թվականի հոկտեմբերի 13-ի N 136-Ա/1 հրամանի՝ 2011 թվականի հոկտեմբեր-դեկտեմբեր ամիսներին իրականացվել են սոցիոլոգիական հարցումներ, որի արդյունքների ամփոփումը հիմք կդառնա Հայաստանի երիտասարդության ազգային զեկույցի մշակման համար։

Երևանում հետազոտությունն անցկացվել է 10 համայնքներում' ընդհանուր առմամբ 55 մեծ, միջին և փոքր փողոցներում և հանրապետության բոլոր 10 մարզերում՝ 16 քաղաքներում և 37 մեծ ու փոքր գյուղական համայնքներում: Ընտրանքի բաշխումը կատարվել է ըստ տոկոսային համամասնության և հետագա ճշգրտումների' նախապես որոշելով յուրաքանչյուր համայնքում և մարզում ընտրանքի նվազագույն ծավալը: Կատարվել է ընտրանքի համակշռում' ըստ սեռի, տարիքի, բնակավայրի և կրթության չափանիշների:

Հետազոտության շրջանակներում ընդգրկվել են տարբեր ոլորտներում հայտնի փորձագետներ։

Միևնույն ժամանակ, համաձայն Միավորված ազգերի կազմակերպության զարգացման ծրագրերի և ՀՀ վարչապետին առընթեր ազգային երիտասարդական քաղաքականության խորհրդի միջև 2011 թվականի հուլիսի 15-ին ստորագրված փոխըմբռնման հուշագրի, ՄԱԶԾ-ի հայաստանյան գրասենյակի կողմից իրականացվել է ««Երիտասարդների ձգտումները և ակնկալիքները» հանրապետական հարցում» ծրագիրը, որի արդյունքների ամփոփումից հետո դրանք կհամադրվեն իրականացված սոցիոլոգիական հարցումների հետ, որից հետո 2012 թվականի առաջին կիսամյակում կտպագրվի Հայաստանի երիտասարդության ազգային զեկույցը:

Կատարված աշխատանքների արդյունքները կդառնան այն հիմքը, որի վրա կխարսխվի 2013-2017 թվականների երիտասարդական պետական քաղաքականության մշակման համար անհրաժեշտ առաջարկությունների փաթեթը: