Մեծ Բրիտանիան Մավրիկիոսին կհանձնի Չագոս արշիպելագը

Մեծ Բրիտանիայի վարչապետ Քիր Սթարմերը Մավրիկիոսի հետ համաձայնագիր կստորագրի Չագոս արշիպելագը նրան հանձնելու վերաբերյալ։ Այս մասին հայտնում է բրիտանական The Daily Telegraph թերթը։

Վարչապետը հինգշաբթի օրը՝ մայիսի 22-ին, կմասնակցի «վիրտուալ ստորագրման արարողությանը» Մավրիկյան կառավարության ներկայացուցիչների հետ: Ի լրումն հեռավոր, բայց ռազմավարական նշանակություն ունեցող կղզիների վրա ինքնիշխանությունից հրաժարվելուց՝ Բրիտանիան Մավրիկիոսին, ընդհանուր առմամբ, մոտ 9 միլիարդ ֆունտ (12 միլիարդ դոլար) կվճարի ռազմակայանի օգտագործման համար:

Երկրների միջև համաձայնությունը ձեռք է բերվել 2024 թվականի հոկտեմբերին։ Որոշումը քննադատության է ենթարկվել թագավորության ընդդիմադիր Պահպանողական կուսակցության կողմից, որը կարծում է, որ Մավրիկիոսի սերտ կապերը Չինաստանի հետ սպառնում են Դիեգո Գարսիա կղզում բրիտանացի զինվորականների անվտանգությանը։