Հարսնաքարի գործով վկայի նախաքննական և դատաքննական ցուցմունքներում կան էական հակասություններ

Վահե Ավետյանի գործով այսօրվա նիստում շարունակվեց «Հարսնաքար» ռեստորանային համալիրի տնօրեն Զոհրաբյանի հարցաքննությունը: Տուժող կողմը ռեստորանային համալիրի տնօրենից փորձում էր պարզել մի շարք հարցեր՝ կապված ռեստորանի անձնակազմի աշխատանքի սկզբունքների և հատկապես անվտանգության համակարգի հետ, հատկապես՝ այն հարցով, թե ինչքան ժամանակ են անվտանգության աշխատակիցները փորձաշրջան անցել աշխատանքի անցնելուց առաջ, տեսանկարահանող տեսախցիկները որտեղ են տեղադրված եղել և հատկապես ինչ շառավիղ են ընդգրկում:

Հարսնաքարի տնօրենը՝ գործով վկան, ասաց, որ փորձաշրջան անցնելու վերաբերյալ կոնկրետ օր չի կարող ասել, քանի որ ոմանք անցնում են աշխատանքային փորձաշրջան երեք օրվա ընթացքում, ոմանք էլ՝ չորս օր, կամ մեկ շաբաթ. «Երբ պետք են եղել, կանչել ենք, հիմնականում գիշերները, քանի որ այցելուների թիվն այդ ընթացքում ավելի շատ է լինում»,-հավելեց Հարսնաքարի տնօրենը:

Վերջինս չմտաբերեց անվտանգության համակարգը տեղադրող կազմակերպության անունը:

Նա չհիշեց նաև, թե երբ է ինքը եղել ռեստորանային համալիրում, իսկ հարցին ի պատասխան՝ նշեց, որ ինքն այդ օրը ռեստորանի սեփականատեր Ռուբեն Հայրապետյանին չի հանդիպել ռեստորանում:

Փաստաբան Տիգրան Եգորյանի հարցին, թե պարոն Զոհրաբյանը զանգահարե՞լ է ռեստորանի սեփականատեր Ռուբեն Հայրապետյանին, վերջինս պատասխանեց, որ ինքը մոտ ժամը 11-ին ինֆորմացիա է հաղորդել այն մասին, որ միջադեպ է տեղի ունեցել աշխատակիցների և հաճախորդների միջև:

Ըստ վկայի՝ միջադեպի առիթ է հանդիսացել սպորտային համազգեստը, իսկ խմած լինելը սրացրել է այն: Պաշտպան Մարինե Թովմասյանի այն հարցին, թե, ի վերջո, միջադեպը ինչպես կորակի՝ ծեծկռտուք, թե՝ ծեծ, վկան պատասխանեց. «Տղաների հիմնական նպատակն է եղել հանդարտեցնել իրավիճակը»:

Հաշվի առնելով, որ վկայի նախաքննական և դատաքննական ցուցմունքներում կան էական հակասություններ՝ մեղադրողներ Արմեն Մարուխյանն ու տուժողների ներկայացուցիչ Տիգրան Եգորյանը միջնորդեցին հրապարակել վկա Զոհրաբյանի ցուցմունքները:

Դատարանը բավարարեց միջնորդությունը. ընդմիջումից հետո վկայի ցուցմունքները կհրապարակվեն: