Հարկայինը չի անհանգստացնի փոքր և միջին բիզնեսի ներկայացուցիչներին

Այսօր լրագրողների հետ հանդիպմանը Պետական եկամուտների կոմիտեի փոխնախագահ Արմեն Ալավերդյանը նշեց, որ 2012–ի բյուջեի հիմնական թիրախները իրենք արդեն առանձնացրել են։ «Ներկայումս մենք հանդիպումներ ենք անցկացնում, առաջին հերթին հրավիրում ենք խոշոր հարկատուներին, ավելացված արժեքի հարկ վճարողներին, այն հարկատուներին, որոնց վրա հիմնակում ընկած է հարկային բեռը», – նշեց կոմիտեի փոխնախագահը։ Այդպիսին ըստ Ա. Ալավերդյանի տվյալների 462 հարկատու կա, որոնց վճարումներից էլ կազմավորվում է հարկային եկամտի 60%–ը։ 

Ըստ նրա՝ հարկային եկամտի դաշտում 3000–4000 վճարողը վճռական նշանակություն ունի։ Դրանք ԱԱՀ վճարողների այն մասն են, որոնց շրջանառությունը գերազանցում է 100 մլն դոլարը, և նրանք ապահովում են պետական եկամուտների 80%–ը։ «Ելնելով այդ հանգամանքից կանխատեսվում է, որ 2012թ.–ին այդ համամասնությունը կպահպանվի, այդ ԱԱՀ վճարողների հաշվին մենք կպահենք», – նշեց նա:

Փոխնախագահի խոսքերով՝ փոքր և միջին բիզնեսի ներկայացուցիչներին իրենք չեն անհանգստացնի իրենց ստուգումներով։ Միևնույն ժամանակ նա նշեց.«Լրացուցիչ հարկերի մի մասն էլ իհարկե բաժին կընկնի փոքր և միջին բիզնեսի ներկայացուցիչներին՝ ելնելով նրանց  շրջանառությունների ծավալից, որոնք որ գտնվում են արտոնյալ դաշտում, որովհետև նրանք ԱԱՀ–ից ազատված են»։