Որևիցե 24 ժամի մասին խնդիր չի կարող լինել

Այսօր լրագրողների հետ հանդիպմանը պետական եկամուտների կոմիտեի փոխնախագահ Արմեն Ալավերդյանը, անդրադառնալով լրագրողի այն հարցին, թե շատ օտարերկրյա ներդրողներ բողոքում են, որ չեն կարողանում այստեղ բիզնես սկսել, նշեց, որ խոշոր ներդրողների մոտ օտարերկրյա  ներդրումով կազմակերպություններ իսկապես կան և դրանք առաջատար դիրքեր են գրավում, ըստ արժանվույն ներկայացված են մեր խոշոր ներդրողների ցանկում։

Անդրադառնալով «Փարիզյան սուրճ»–ի տիրուհի Վալերի–Աշխեն Գործունյանի գործին, ով հիշեցնենք ստիպած էր եղել դադարեցնել իր գործունեությունը Հայաստանում, փոխնախագահը նշեց, որ դա գործարարի անձնական գործն է հեռանալ Հայաստանից կամ մնալ. «Տվյալ սուբյեկտը եթե որոշել է Հայաստանում բիզնեսով չզբաղվել, այդ գործունեությունը դատարկ տեղը չի մնա, այդ գործունեությամբ ևս հազարավոր տնտեսվարող սուբյեկտներ կան»։ Նա հավատացած է, որ եթե առաջարկի և պահանջարկի տրամաբանությամբ շարժվենք, տնտեսվարող տասնյակ սուբյեկներից մեկը կզբաղեցնի այդ սեգմենտը։ 

Իսկ ինչ վերաբերում է սրճարանի տիրուհուն 24 ժամ տրամադրելուն՝ Ա. Ալավերդյանը նշեց, որ Հայատանում նման ժամկետ կամ նման պահանջ սահմանող օրենք չկա։ «Մենք նաև առաջարկեցինք, որ եթե այդպիսի բան է եղել, թող ցույց տա մի այնպիսի օրենք, որ մեզ հնարավորույթուն է տալիս գործարարի առաջ 24 ժամվա խնդիր դնել։ Մեր օրենսդրության մեջ մենք այդպիսի օրենք չունենք։ Օրենքը ասում է հետևյալը՝ պարտավորությունը առաջանում է՝ 10 օրվա մեջ վճարում կատարիր, իսկ հարկային հաշիվները կարող են դատարանի վճռով կալանվել, եթե դատարանի վճիռն էլ չի օգնում, գույքի բռնագանձման հայց է ներկայացվում, եթե այդ հայցն էլ չի օգնում, դա արդեն տևում է 180 օր, 180 օր հետո հարկային մարմինը կարող է սնանկացման հայցով մտնել դատարան։ Որևիցե 24 ժամի մասին խնդիր չի կարող լինել», – հավատացրեց փոխնախագահը։