Կալանավորվել է Կապանի դատական բժիշկը

Երկու ամսով կալանավորվել է Կապանի տարածաշրջանի դատական բժիշկ Գագիկ Բաբայանը: Ըստ Henaran.am-ի աղբյուրների նա ևս մեղադրվում է առանձնապես ծանր հանցագործության վերաբերյալ քրեական գործով ապացույցների կեղծման մեջ:

Հիշեցնենք, որ 2010 թ. օգոստոսի 28-ին, ժամը 20-ի սահմաններում, Քաջարանի մշակույթի տան մոտակայքում գործող սրճարանի բացօթյա հատվածում Գրիգոր Պապյանի հետ Գեւորգ Թոսունյանի եւ Սահակ Սահակյանի վիճաբանելու, միմյանց նկատմամբ բռնություն գործադրելով խուլիգանություն կատարելու դեպքի առթիվ ՀՀ ոստիկանության Սյունիքի մարզի քննչական բաժնում ՀՀ քրեական օրենսգրքի 258-րդ հոդվածի 3-րդ մասի 1-ին կետով հարուցված, ինչպես նա նույն օրը ժամը 22:30-ի սահմաններում Գրիգոր Պապյանին սպանելու դեպքով Սյունիքի մարզի ընդհանուր իրավասության դատարանում քննվող քրեական գործերով ՀՀ ոստիկանության քննչական գլխավոր վարչության հատկապես կարեւոր գործերի քննության վարչությունում իրականացված նախաքննությամբ պարզվել է, որ քրեական գործերով նախաքննություն եւ հետաքննություն իրականացրած առանձին պաշտոնատար անձինք չարաշահել են իրենց պաշտոնեական լիազորությունները եւ առանձնապես ծանր հանցագործության վերաբերյալ քրեական գործով ապացույց են կեղծել:

Ի դեպ, նույն գործով, 2012 թ. դեկտեմբերի 5-ին ձերբակալվել եւ երկամսյա կալանք էին սահմանել ոստիկանության Սյունիքի մարզային վարչության Կապանի բաժնի պետի օպերատիվ գծով նախկին տեղակալ Գագիկ Դանիելյանի նկատմամբ: Նա ձերբակալվել է' ՀՀ քրեական օրենսգրքի 349 հոդվածի 3-րդ մասի 1-ին կետով նախատեսված հանցագործություն կատարելու կասկածանքով: Մասնավորապես, լինելով հետաքննություն իրականացնող պաշտոնատար անձ, առանձնապես ծանր հանցագործության վերաբերյալ քրեական գործով կեղծել է ապացույց:

Նույն աղբյուրների փոխանցմամբ, գործի կեղծման հետ կապ ունեն նաեւ Սյունիքի մարզի նախկին դատախազ Արայիկ Թարվերդյանն ու դատախազի տեղակալ Էդիկ Հովսեփյանը, ով այս գործով վերահսկող դատախազն է: Թարվերդյանը մոտ երկու ամիս առաջ ազատվեց աշխատանքից, իսկ Հովսեփյանի նկատմամբ կարգապահական վարույթ էր հարուցվել, որիկց հետո նա դիմում գրեց աշխատանքից ազատվելու համար: