Մատաղիսի գործով հայտնվել է ձայնասկավառակ

Մատաղիս զորամասում սպանված զինծառայող Ռոման Եղիազարյանի հորեղբայրը, մայրը եւ հարազատներն այսօր «Հայելի» ակումբում խիստ վրդովված ասուլիս էին հրավիրել: Նրանց վրդովեցրել է այն, որ Շիրակի մարզի ընդհանուր իրավասության դատարանը արդարության դատավճիռ էր կայացրել՝ 3 մեղադրյալների՝ Ռազմիկ Սարգսյանի, Մուսա Սերոբյանի, Արայիկ Զալյանի հետ կապված:

Սպանված զինծառայող Ռոմանի հարազատները վստահ են, որ այդ տղաներն են հենց մարդասպանները: Հարցին՝ թե ինչու մյուս սպանվածի՝ Հովսեփ Մկրտումյանի ծնողներն այլ կարծիք ունեն, գտնում են, որ 3 տղաները, որոնք կալանավորվել էին, մեղավոր չեն՝ Ռոմանի հորեղբայր Արթուր Եղիազարյանը պատմեց. «Մովսեսը՝ Հովսեփի հայրը, մի օր եկել է իմ հետ խոսալու, թե Արթուր, արի գնանք Լենինական: Հետո իմացա, որ նա հենց Լենինականի կողմից է եկել մեր տուն»: Մենք ճշտեցինք, թե Լենինականում ո՞վ է ապրում, ո՞ւմ տնից է եկել՝ հորեղբայրը վստահեցրեց, որ այնտեղ է ապրում «մարդասպաններից մեկը՝ Ռազմիկը», եւ Հովսեփ Մկրտումյանի ծնողները համաձայնության են եկել նրա ընտանիքի հետ:

Ավելին՝ Ռոմանի մայրը՝ Գոհարը, վստահեցրեց, որ իրենց էլ են առաջարկել համաձայնության գալ՝ «ուզում էին որդուս արյունը ծախել: Ոմն Վաչե եկավ, թիվ չի ասել, ասում էին՝ ինչ եղել է, եղել է: Ասի՝ դուրս արի իմ տնից, եթե ուզում ես ամբողջ մարմնով դուրս գաս»:

Լրագրողների դիտարկմանը, որ ձեզ էլ մեղադրում են Գագիկ Ջհանգիրյանի հետ համագործակցելու մեջ՝ նրանք վստահեցրին, որ Ջհանգիրյանը շատ ճիշտ որոշում է կայացրել՝ զինդատախազ եղած ժամանակ:

Հարազատները իրենց հետ բերել էին մի ձայնասկավառակ. «Այստեղ կա մարդասպան Ռազմիկ Սարգսյանի խոստովանական ցուցմունքը, որտեղ պատմում է, թե ոնց է երեխաներին սպանել, խփել»: Ըստ հորեղբոր, այս տեսագրությունը տեսնելուց հետո որեւէ մեկի մոտ հարց չի առաջանա, բոլորն էլ կհամոզվեն, որ հենց նրանք են մարդասպանները:

Հարազատները մեղադրում էին նաեւ «Ժառանգության» պատգամավոր Զարուհի Փոստանջյանին՝ մարդասպաններին ամեն կերպ արդարացնելու փորձ անելու համար: Այս մասին գրում է Aravot.am-ը: