2 հայ կանայք ստիպել էին աղջկան Թուրքիայում զբաղվել մարմնավաճառությամբ և յուրացրել նրա «վաստակը»

Այսօր՝ հունվարի 16-ին, Շիրակի մարզի ընդհանուր իրավասության դատարանում շարունակվեց քրեական գործի դատաքննությունը ըստ մեղադրանքի Սուսաննա Մարտիրոսյանի՝ «Դոկտոր» մականվամբ և Նարինե Մովսիսյանի ՀՀ քրեական օրենսգրքի 132-րդ հոդվածի 2-րդ մասի 2,6 կետերով նախատեսված հանցագործության կատարման համար, այն է՝ մարդու թրաֆիքինգը, որը կատարվել է երկու կամ ավելի անձանց նկատմամբ ՀՀ սահմաններից անձի տեղափոխելու միջոցով: Այս մասին գրում է iravaban.net–ը։

Նրանք մեղադրվում են այն բանի համար, որ քաղաքացի Հ. Մ. ստիպել են Թուրքիայի «Իշիկ» հյուրանոցում զբաղվել մարմնավաճառությամբ, նրան շուրջ չորս ամիս պահել է պոռնկության շահագործման մեջ և ստացել մարմնավաճառությամբ վաստակած շուրջ 7.500 ԱՄՆ դոլլար: Որպես խափանման միջոց կիրառվել է կալանավորումը:

Այսօր դատաքննությանը ներկա էին մեղադրողը, տուժողը, ամբաստայալները՝ հատուկ դասակի ուղեկցությամբ և վերջիններիս շահերի պաշտպանները:

«Դոկտորի» պաշտպանը հանդես եկավ միջնորդությամբ, որով խնդրեց դատարանին իր վստահորդի մասով կարճել քրեական գործը և դադարեցնել քրեական հետապնդումը: Նարինե Մովսիսյանի պաշտպանը ևս միջնորդեց կարճել քրեական գործը և դադարեցնել քրեական հետապնդումը:

Կարծես թե դատաքննությունը ընթանում էր բնականոն հունով, սակայն հանկարծակի ամբաստանյալ Սուսաննա Մարտիրոսյանի վիճակը վատթարացավ, արդյունքում դատական նիստերի դահլիճ հրավիրվեց շտաբ բուժօգնություն: Բուժօգնություն ցուցաբերվեց ամբաստանյալին և ըստ բուժօգնության աշխատակցի՝ ամբաստանյալի խոսքերով արյան ճնշումը 90/60 է, իսկ տվյալ պահին բարձրացել էր 140/100, առկա է նեվրոզ:

Դատարանը հայտարարեց 30 րոպե ընդմիջում:

Շուրջ 30-40 րոպե բուժօգնության աշխատակիցը չհեռացավ դատական նիստերի դահլիճից, այնուհետև դատարանին առաջարկեց ամբաստանյալին տեղափոխել հիվանդանոց, քանի որ ներարկված դեղորայքն իր արդյունքը չի տվել, ուստի, անհրաժեշտ է հիվանդին տեղափոխել հիվանդանոց՝ վիճակը կարգավորելու համար:

Դատարանը չմերժեց և դատական նիստը հետաձգեց մինչև հունվարի 30-ը, ժամը 14:00-ն: