Վերադարձ, կամ վունդերկինդը բանտում

Բոլորովին վերջերս pastinfo.am կայքում նկատեցի այս լուսանկարը. դատապարտյալ Մհեր Վարազդատի Շահնազարյան և ՀՀ արդարադատության նախարար Հրայր Թովմասյան: Ինձ հետաքրքրողը Մ. Շահնազարյանն է, քանզի ես նրա դեմ հարուցված քրեական գործով տուժող եմ: Ակամայից բոլորին կթվա, թե հիմա կսկսեմ վատաբանել, կխոսեմ նրա թերություններից և այլն: Սակայն ոչ, քանզի Մ. Շահնազարյանի դատապարտվելը իրոք բավականին ցավալի երևույթ էր, որևէ մեկը իր ծանոթներից, այդ թվում նաև ես, չէինք ցանկանա, որպեսզի նա հայտնվեր բանտում: Այո, նա բանտում է, սակայն նա իր էությամբ դրական կերպար է: Ինչպես ասում են, եղածը եղել է…..:

Ինձ ուրախացրեց մեկ այլ փաստ…: Ես երբ մտածում էի թե տեսնես' ինչով կզբաղվի Մհերը բանտում, կամ արդյոք նա կդիմանա բանտում, մշտապես բավականին տխուր փաստերի էի հանգում: Կարծում էի, որ նա բանտում պարզապես չի դիմանա: Սակայն այս տարվա սկզբներից հանկարծ Մհեր Շահնազարյանին ես պարբերաբար նկատում եմ տարբեր հեռուստահաղորդումներում. բոլորովին վերջերս հեռարձակված մի հաղորդմամբ պարզվեց, որ նա սովորում է 3 թե 4 համալսարաններում: Սակայն սա դեռ բավարար չէր, երբ Մհերի մտերիմ ընկերոջից ճշտեցի, որ նա հեռակա կրթություն է ստանում աշխարհի 10-ից ավել հռչակավոր համալսարաններում: Այսօր շատերի համար է երազանք սովորել Ջոն Հափքինսի Համալսարանում: Բայց արի ու տես' Մհերին հաջողվել է այդ ամենին հասնել բանտից: Հայկական գենը մշտապես նվերներ է մատուցել աշխարհին:

Մինչ դատապարտվելը Մհեր Շահնազարյանին ես ճանաչել եմ որպես Երևանում քաղաքացիական իրավունքի համար առաջին մասնագետի: Ինչպես հասկացա, ներկայումս նա ձեռք է բերել կամ բերում է լրացուցիչ մասնագիտություններ' իրավական հոգեբանություն, տնտեսագետ: Առավել ուրախալին նաև այն է, որ փաստորեն երկար ժամանակ է' ինչ Մհերը դասավանդում է բանտի դպրոցում այնպիսի կարևոր առարկաներ, ինչպիսիք են անգլերեն, իսպաներեն, ֆրանսերեն, իտալերեն, գերմաներեն և էլի տարբեր առարկաներ:

Ես հավատում էի, որ դու կվերադառնաս, Մհեր, կվերագտնես քեզ: Սակայն այսքան ընդգրկուն և լայնածավալ անկեղծ չէի սպասում: Դե, իհարկե, ինչպես կարելի է այդ ամենին հասնել, եթե չկա բանտի ղեկավարության' ՀՀ բանտերի վարչության աջակցությունը, որը, ինչպես ճշտեցի, կոչվում է ՀՀ արդարադատության նախարարության քրեակատարողական վարչություն: Ուղղակի ողջունում եմ և շնորհակալություն եմ հայտնում այդ պետական մարմիններին նման աջակցության համար:

Ես չեմ կարող ասել թե Մհեր Շահնազարյանին օրենքով ինչ արտոնություններ են վերապահված, սակայն ես գտնում եմ, որ Մհերը այսօր պետք է հասարակությանը: Բոլորովին վերջերս մենք Մ. Շահնազարյանի պատժից ազատման հարցով դիմել ենք նաև ՀՀ Նախագահին: Ես չգիտեմ' ում դիմեմ և ինչ անեմ, ինչ է կախված ինձանից, ինչ փաստաթուղթ պետք է' ստորագրեմ, որով ես կարագացնեմ Մ. Շահնազարյանի պատժից ազատվելը:

Ես չեմ անդրադառնում այն գործի էությանը, որով իմ և Մհեր Շահնազարյանի միջև քրեական դատավարություն եղավ: Դրա մասին Մհերը արդարացիորեն խոսել է դատարանում:

Ժամանակներն անցել են, հիմա նոր ժամանակներ են, իսկ այս ժամանակներում Մ. Շահնազարյանի նման մարդիկ պետք են մեզ ոչ թե բանտում, այլ ազատ հասարակությունում:

Սեդա Դավթյան