Արթուր Սաքունցը՝ դատապարտյալի ինքնասպանության փորձի պատճառի մասին

Օրեր առաջ ՀԱԿ ակտիվիստ, քաղբանտարկյալ Տիգրան Առաքելյանն ահազանգեց 20-ամյա երիտասարդի հնարավոր ինքնասպանության մասին: Վերջինս նամակում դիմել էր Մարդու իրավունքների պաշտպանին իր 20-ամյա խցակցին, ով նախօրեին ինքնասպանության փորձ էր կատարել, ուշադրության ներքո պահելու խնդրով:

ՄԻՊ-ն արձագանքեց Տիգրան Առաքելյանի նամակին: Պաշտպանի արագ արձագանքման բաժնի աշխատակիցները այցելեցին «Նուբարաշեն» քրեակատարողական հիմնարկ, սակայն, անորոշ պատճառներով, ինքնասպանության փորձ կատարած Սերոբ Մխիթարյանը հրաժարվել էր հանդիպել աշխատակիցների հետ:

Նշենք, որ երկու ամսվա ընթացքում սա արդեն երկրորդ դեպքն էր, որ Սերոբը ինքնասպանության փորձ է կատարել:

Լուրեր.com-ի տեղեկություններով Սերոբ Մխիթարյանին այցելել է նաև Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:

Մեզ հետ զրույցում վերջինս հաստատեց տեղեկությունը և նշեց, որ իրենց հիմնական խնդիրն է հասկանալ, թե ինչու է քրեակատարողական հիմնարկում գտնվող Սերոբ Մխիթարյանը երկու անգամ ինքնասպանության փորձ կատարել:

«Պետք է հասկանալ թե ինչն է պատճառ հանդիսացել, որ նա փորձ է արել ինքնասպանության: Փառք Աստծո, դեպքը կանխվել է. խցակիցները հայտնաբերել են և փրկվել է կյանքը, բայց պատճառն է անհրաժեշտ իմանալ: Միանշանակ է նաև, որ պատճառը քրեական գործի հետ կապված խնդիրներն են: Ես նախնական ուսումնասիրության հիման վրա կարող եմ պնդել, որ այդ պատճառով Սերոբը կարող էր գտնվել նման հոգեկան վիճակում: Մենք քրեական գործում փաստաբան կներգրավվենք, որ վերջինիս պաշտպանության խնդիրը լուծենք: Այս պահին լրացուցիչ մանրամասներ ասել չեմ կարող, բայց նշեմ, որ Սերոբ Մխիթարյանն անհուսության վիճակից կարծես թե դուրս է եկել: Մենք իհարկե չենք ասում, որ բոլոր հարցերը կլուծենք, բայց մենք կզբաղվենք այս գործով, դա՝ միանշանակ: Բայց իր իրավունքների պաշտպանությունը կախված է նաև հենց իրենից: Այսինքն՝ հենց ինքը պետք է կարողանանա մեզ հետ համագործակցել»,- ասաց Արթուր Սաքունցը: