Աշխատանքային պայմանագրերը կնքվելու են էլեկտրոնային համակարգով. այն հնարավորություն կտա լուծել մի շարք խնդիրներ. Սարգսյան

Հունվարի 1-ից աշխատանքային պայմանագրերը կնքվելու են բացառապես էլեկտրոնային տարբերակով, աշխատանքային օրենսգրքում կատարված փոփոխություններն ուժի մեջ են մտել տարեսզկբից։ «Արմենպրես»-ի մամուլի սրահում այսօր՝ հունվարի 7-ին ասուլիսով հանդես է եկել աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը։

«Այս համակարգի ներդրումը հնարավորություն կտա և՛ գործատուների, և՛ աշխատակիցների համար մի շարք խնդիրներ լուծել։ Մասնավորապես գործատուներն ու աշխատակիցները այսուհետ կունենան օրինակելի ձևով կազմված պայմանագիր, այսինքն այն խնդիրը, որը մենք բազմիցս արձանագրել ենք, որ պայմանագրերը չեն համապատասխանում օրենսդրությանը, ստացվում է, որ հնարավորինս չի լինելու»,-ասաց  Ժորա Սարգսյանը։ 

Նրա խոսքով պայմանագրերի լրացման հարթակում նախատեսված է նաև պարտադիր լրացման ենթակա դաշտ,  կլինեն հուշումներ, թե ինչպես է պետք լրացնել դրանք, ինչը կհեշտացնի գործընթացը։ 

«Մյուս խնդիրը, որը կլուծվի, այն է, որ մենք հանդիպել ենք դեպքերի, երբ աշխատողներն այդպես էլ իրենց աշխատանքային պայմանագրի օրինակը չեն ստացել կամ ստացել են ավելի ուշ քան նախատեսված էր աշխատանքային օրենսդրությամբ։ Համակարգի ներդրման պարագայում այս խնդիրը ևս լուծվում է, որովհետև պայմանագիրը ստեղծվում է օնլայն հարթակում, հետաբար անմիջապես աշխատողը, երբ կստորագրի, կտեսնի իր պայմանագիրը։

Երրորդ խնդիրը, որը կարող է լուծվել, վերաբերում է տեսչական վերահսկողական մեխանիզմներին, որովհետև, երբ ստուգում կբացվի գործատուի մոտ աշխատանքային հարաբերությունների մասով, հնարավորություն կլինի արդեն իսկ տեսնել, թե ինչ պայմանագիր կա կողմերի միջև կնքված, այդ պայմանագրերում ինչ փոփոխություններ կան արված և տվյալ պահին ինչ իրավիճակում են գտնվում իրենց հարաբերությունները»,-ասել է Սարգսյանը։