Բռնաբարող եղբոր փոխարեն կալանավորվել է օգնության հասած ամուսինը. վերջինս կարել է բերանը

Այսօր՝ հունվարի 21-ին, «Իրավաբանների և հոգեբանների միջազգային ասոցիացիա» է դիմել Արցախի 4-րդ նրբանցքի բնակչուհի Մ. Պետրոսյանը՝ իրավաբանական և հոգեբանական աջակցության ակնկալիքով: Այս մասին գրել է shamshyan.com-ը։

Ասոցիացիայի նախագահ Խաչատուր Մառոզյանին Մ. Պետրոսյանը պատմել է, որ 2012թ. դեկտեմբերի 10-ին, նրա եղբայրը՝ Արման Խաչատուրովը, իրենց տանը փորձել է բռնաբարել իրեն, սակայն այդ պահին վերադարձել է ամուսինը՝ Արթուր Պետրոսյանը և ականատես լինելով կատարվածին՝ ծեծի ենթարկել Ա. Խաչատուրովին:

Դեպքից հետո Մ. Պետրոսյանի ամուսինը ներկայացել է ոստիկանություն և պատմել կատարվածը:

Շենգավիթի քննչական բաժնում փաստի առթիվ հարուցվել է քրեական գործ՝ ՀՀ քր. Օր-ի 112 հոդվածի հատկանիշներով (գիտակցաբար ծանր մարմնական վնասվածքներ հասցնելը) և հաշվի առնելով մեղմացուցիչ հանգամանքները, որ Ա. Պետրոսյանն ինքն է ներկայացել ոստիկանություն, նախաքննության ընթացքում չի թաքնվել, չի խոչնդոտել քննչական մարմնի աշխատանքներին, խնամքին ունի 2 անչափահաս երեխա և հաշմանդամ ծնողներ՝ վերջինս ստորագրությամբ բաց է թողնվել:

Սակայն հունվարի 6-ից հետո նախաքննական մարմինների մոտեցումը փոխվել է և քննիչը միջնորդություն է ներկայացրել Շենգավիթի ընդհանուր Իրավասության դատարան՝ Արթուր Պետրոսյանի նկատմամբ խափանման միջոցը փոխելու և նրան նախնական կալանքի վերցնելու պահանջով: Դատարանը բավարարել է միջնորդությունը:

Ինչպես shamshyan.com–ին հայտնել է «Իրավաբանների և հոգեբանների միջազգային ասոցիացիայի» նախագահ Խ. Մառոզյանը՝ այսօր արդեն կալանավայրից լուր է ստացվել, որ Ա. Պետրոսյանը դիմել է ծայրահեղ միջոցի՝ ի նշան բողոքի կարել է բերանը:

Ասոցիացիա դիմած Մ. Պետրոսյանը հայտնել է, որ ինքը նախաքննական մարմիններին պատմել է, որ եղբայրը իրեն առաջին անգամ բռնաբարել է դեռ 15 տարեկան հասակում, և ամուսնությունից հետո էլ շարունակել է սեռական բնույթի պահանջներ ներկայացնել:

Այս պահին Մ. Պետրոսյանը հոգեկան ծանր վիճակում գտնվում է ասոցիացիայում, որտեղ նրան արդեն իսկ օգնություն են ցուցաբերում: Մ. Պետրոսյանի դիմումի հիման վրա՝ ասոցիացիայի փաստաբան Մարտին Շիրինյանն արդեն իսկ Վերաքննիչ դատարան բողոք է ներկայացրել՝ Շենգավիթի ընդհանուր իրավասության դատարանի որոշման՝ Ա. Պետրոսյանին նախնական կալանքի վերցնելու դեմ:

Ներկայումս Մ. Պետրոսյանը և նրա երկու զավակները գտնվում են ամուսնու եղբոր խնամքի տակ:

Մ. Պետրոսյանը պահանջում է կալանավորել ոչ թե ամուսնուն, այլ եղբորը՝ պնդելով, որ նա լուրջ վտանգ է ներկայացնում իր համար: