Դուբայում ցույց են տվել շքեղ բունկերների լուսանկարները

Daily Mail պարբերականը հրապարակել է Դուբայում գտնվող շքեղ բունկերների լուսանկարներ և ներկայացրել դրանց ներքին պայմանները՝ Իրանի օդային հարձակումների ֆոնին։ Լրատվամիջոցի տվյալներով՝ քաղաքի ամենապաշտպանված վայրերից մեկը համարվում է Զաբիլ պալատը, որտեղ բնակվում է էմիրատի ղեկավար Ալ Մաքթումների ընտանիքը։

Նշվում է, որ պալատը հագեցած է մի քանի պաշտպանված սենյակներով և ունի ինքնավար էներգամատակարարման համակարգ, ինչը հնարավորություն է տալիս այնտեղ գտնվել երկար ժամանակ՝ նույնիսկ արտաքին վտանգների պայմաններում։ Նման մակարդակի անվտանգության համակարգեր ունեն նաև Դուբայի մի շարք ամենաթանկ առանձնատները, այդ թվում՝ Emirates Hills թաղամասում գտնվող Marble Palace-ը, որտեղ կան պայթյունակայուն սենյակներ և սեփական ենթակայան։

Միաժամանակ սոցիալական ցանցերում բլոգերները տարածում են տեսանյութեր, որտեղ երևում է, որ որոշ բնակիչներ և հյուրեր ապաստանում են շենքերի ստորին հարկերում գտնվող մարզասրահներում։ Շատ հինգաստղանի հյուրանոցներ ևս հյուրերին տեղափոխում են պաշտպանված տարածքներ՝ պատուհաններից հեռու հատվածներ։