CNN․ Իրանի ականները կարող են մի քանի օրում փակել Օրմուզի նեղուցը

Իրանի կողմից Օրմուզի նեղուցում տեղադրվող ծովային ականները կարող են աշխարհի կարևորագույն նավարկային ուղիներից մեկը մի քանի օրում վերածել «դժոխային տարածքի»։ Այս մասին CNN-ին տված հարցազրույցում հայտարարել է ՆԱՏՕ-ի դաշնակցային ուժերի նախկին գերագույն հրամանատար, ծովակալ Ջեյմս Սթավրիդիսը։

Նրա խոսքով՝ Իրանը տասնամյակներ շարունակ պատրաստվել է նեղուցի ականապատմանը և իր զինանոցում ունի ավելի քան 5000 ծովային ական։ Սթավրիդիսի գնահատմամբ՝ եթե այդ ականները տեղադրվեն նեղուցում, ապա կարող են կարճ ժամանակում լրջորեն խաթարել համաշխարհային նավթային փոխադրումները։

Ծովակալի խոսքով՝ ԱՄՆ-ը, Մեծ Բրիտանիան և Սաուդյան Արաբիան արդեն ունեն ականազերծման նավեր և հատուկ տեխնիկա Պարսից ծոցում։ Սակայն նույնիսկ այդ հնարավորությունների դեպքում նեղուցի լիարժեք ականազերծումը կարող է տևել մի քանի շաբաթից մինչև մեկ-երկու ամիս։ Ավելի վաղ հաղորդվել էր, որ Իրանը կարող է փոքր նավերով տեղադրել ծովային ականներ Օրմուզի նեղուցում՝ յուրաքանչյուր նավով տեղափոխելով երկուից երեք ական։