Bloomberg․ Իրանի շուրջ պատերազմը խնդիրներ է ստեղծել ԱՄՆ նավթային ոլորտում

Իրանի շուրջ ռազմական լարվածությունը լուրջ խնդիրներ է առաջացրել ԱՄՆ նավթավերամշակող ընկերությունների համար։ Այդ մասին հայտնում է Bloomberg գործակալությունը՝ նշելով, որ Մերձավոր Արևելքում նավթի արտադրության կտրուկ նվազումը ազդել է ամերիկյան էներգետիկ շուկայի վրա։

Նավթի մատակարարումների անկումը սկսվել է այն բանից հետո, երբ Իրանը փակել է տարածաշրջանի կարևորագույն նավթային երթուղիներից մեկը՝ Օրմուզի նեղուցը։ ԱՄՆ-ի և Իսրայելի ռազմական գործողությունների մեկնարկից հետո օրական նավթի արտադրությունը տարածաշրջանում նվազել է մոտ 7 միլիոն բարելով։ Այս իրավիճակը խնդիրներ է ստեղծել այն ամերիկյան ընկերությունների համար, որոնք կախված են Մերձավոր Արևելքից եկող նավթից, այդ թվում՝ Chevron և Marathon Petroleum ընկերությունների համար։

Առավել զգայուն իրավիճակ է ստեղծվել Կալիֆոռնիայում, որտեղ նավթի գների աճը արդեն հանգեցրել է մի շարք նավթավերամշակող գործարանների փակմանը։ Նահանգում բենզինի գինը գերազանցել է 5 դոլարը մեկ գալոնի համար, ինչը զգալիորեն բարձր է ԱՄՆ միջին ցուցանիշից։ Վերլուծաբանների խոսքով՝ ԱՄՆ-ը կարող է փորձել փոխարինել մատակարարումները Մեքսիկական ծոցից, Կանադայից կամ Ալյասկայից, սակայն սահմանափակ առաջարկի պատճառով այդ նավթի արժեքը նույնպես աճում է։