2 ամիս կալանք դատախազին հարվածելու համար

Կենտրոն և Նորք-Մարաշ վարչական շրջանների ընդհանուր իրավասության դատարանում դատավոր Արշակ Վարդանյանի նախագահությամբ այսօր սկսվեց «Մոսկվա» կինոթատրոնի դրամարկղից գողություն կատարելու համար դատապարտված Ստեփան Հովակիմյանի դեմ հարուցված քրեական գործի դատաքննությունը: Նա մեղադրվում է 2012-ի հուլիսի 26-ի դատական նիստի ժամանակ մեղադրող դատախազ Սամվել Հարությունյանի նկատմամբ բռնություն կիրառելու համար:

Նշենք, որ հուլիսի 26-ին Կենտրոն և Նորք-Մարաշ վարչական շրջանների ընդհանուր իրավասության դատարանում Ստեփան Հովակիմյանը վնասել էր ինքն իրեն: Դատարանում խառնաշփոթ էր սկսվել: Գործով մեղադրող դատախազ Սամվել Հարությունյանը մոտեցել էր ամբաստանյալին և փորձել կարգի հրավիրել նրան, ինչի ընթացքում, ըստ մեղադրանքի, Հովակիմյանը հարվածել է դատախազին:

Լուրեր.com-ի հետ զրույցում, սակայն, Ս. Հովակիմյանի հայրը՝ Բենիամին Հովակիմյանն ասաց, որ իրեն հայտնել են, որ դատախազ Ս. Հարությունյանն է հարվածել որդուն:

Դատական նիստի ընթացքում որպես վկա դատաքննական ցուցմունք տվեցին հուլիսի 26-ի դատավարությանը ներկա ոստիկանները, ովքեր հաստատեցին նախաքննական փուլում իրենց տված ցուցմունքները, ըստ որոնց՝ Ստեփան Հովակիմյանը փորձել է հարվածել դատախազին:

Դատախազ Սամվել Հարությունյանն էլ իր հերթին նշեց, որ ամբաստանյալը թշնամանքով էր նայում իրեն և միտում ուներ իրեն հարվածելու:

Դատախազը նշեց նաև, որ հարվածը թույլ է եղել, և ինքը չի վնասվել, իսկ ամբաստանյալ Ստեփան Հովակիմյանն էլ իր հերթին ներողություն խնդրեց Հարությունյանից:

Նիստի ընթացքում մեղադրող դատախազը միջնորդեց դատարանին Ստեփան Հովակիմյանի նկատմամբ որպես խափանման միջոց կիրառել կալանավորում 2 ամիս ժամանակով:

Մեկ ժամ ընդմիջումից հետո պաշտպանը դատարանին միջնորդեց ժամանակ՝ մինչև հաջորդ դատական նիստը մեղադրող կողմի միջնորդությանը ծանոթանալու համար:

Դատարանը ևս 15 րոպե ընդմիջումից հետո վճիռ կայացրեց՝ բավարարել մեղադրող կողմի միջնորդությունը Ստեփան Հովակիմյանին 2 ամիս ժամկետով կալանավորելու մասին:

Դատարանի որոշումը տասնօրյա ժամկետում կարող է բողոքարկվել ՀՀ Վերաքննիչ դատարանում:

Նշենք նաև, գործով հաջորդ դատական նիստը տեղի կունենա փետրվարի 15-ին:

Հիշեցնենք, որ նախորդ դատական նիստի ընթացքում այդ օրվա մասին ցուցմունքներ են տվել դատական նիստերի քարտուղար Ռուզան Ավետյանը, Կենտրոն դատարանի դատական կարգադրիչների պատասխանատու Արթուր Փիլոսյանը, դատական կարգադրիչ Մուրադ Գրիգորյանը և հուլիսի 26-ի դատական նիստը լուսաբանած լրագրող Ռուզան Մինասյանը, ով նախաքննությանն է տրամադրել ոչ միայն լուսանկարները, այլև այդ օրը թե’ դատախազի, թե’ Ստեփանի հոր՝ Բենիամին Հովակիմյանի հայտարարությունը, որ իր որդուն հարվածել է դատախազը:

Լուրեր.com-ի հետ զրույցում Բենիամին Հովակիմյանը նշեց, որ «Մոսկվա» կինոթատրոնի գողությունը տեղի է ունեցել 2010-ի հունվարի 10-ին, և որ փետրվարի 6-ից իր որդին ձերբակալված է եղել:

«Դատավարությունն ավարտվել է 2012-ի նոյեմբերին: Այսինքն՝ նախաքննությունն ու դատավարությունը 2 տարի շարունակվել են: Դատախազն արդեն ճառը պետք է ասեր, իրականում ոչ մի ապացույց չունեին՝ բացի ինքնախոստովանական ցուցմունքից: Տղաս հոգեկան խառը վիճակում դատարանի դահլիճում վնասեց ձեռքը, ութ տեղից երակները կտրատեց: Բնականաբար, իր վրա հարձակվեցին ոստիկաններն ու դատարանի հսկիչները և փորձեցին ձեռնաշղթա հագցնել նրան, իսկ ինքը գոռում էր, «էս ի՞նչ եք սարքում իմ գլխին», տարօրինակ ձայներ էր հանում: Խառնաշփոթի ժամանակ, երբ նրան է մոտեցել դատախազը, ասում են, Ստեփանի ականջին ինչ-որ բան է ասել, որից հետո Ստեփանը դատախազին է հարվածել, դատախազը՝ Ստեփանին: Հիմա Ստեփանին դատում են «Պաշտոնատար անձի նկատմամբ բռնության կիրառում հոդվածով: «Մոսկվա» կինոթատրոնի գործով Ստեփանին ձերբակալել էին 3 տարով, որը լրանում է այս տարվա փետրվարի 6-ին։ Հիմա, եթե դատարանը նոր վճիռ չկայացնի, տղաս այդտեղից դուրս կգա»: