Վերլուծաբան․ Իրանը կարող է ամիսներով վերահսկել Օրմուզի նեղուցը

Իրանը կարող է մի քանի ամիս շարունակ պահպանել վերահսկողությունը Օրմուզի նեղուցի նկատմամբ՝ իր ռազմական հնարավորությունների և աշխարհագրական դիրքի շնորհիվ։ Այդ մասին «Լենտա.ռու»-ին տված հարցազրույցում հայտարարել է ամերիկացի ռազմական վերլուծաբան, թոշակի անցած փոխգնդապետ Էրլ Ռասմուսենը։

Վերլուծաբանի խոսքով՝ Իրանը զգալի առավելություն ունի տարածաշրջանում՝ օգտագործելով արագընթաց փոքր նավակներ, հրետանի, անօդաչու թռչող սարքեր և հրթիռային համակարգեր։ Նրա գնահատմամբ՝ նման պայմաններում Թեհրանը կարող է որոշել, թե որ նավերն են անցնելու նեղուցով և որոնք՝ ոչ, ինչը կարող է երկար ժամանակ պահպանել հնարավոր շրջափակումը։

Միաժամանակ Ռասմուսենը նշել է, որ եթե Միացյալ Նահանգները չդիմի ավելի կտրուկ քայլերի, Իրանը կարող է շարունակել վերահսկել իրավիճակը նեղուցում։ Ավելի վաղ Իրանի ԱԳՆ ներկայացուցիչ Իսմայիլ Բաղային հայտարարել էր, որ Օրմուզի նեղուցով նավերի անցումը պետք է համաձայնեցվի Իրանի ռազմածովային ուժերի հետ՝ ընդգծելով, որ տարածաշրջանում ստեղծված լարված իրավիճակը կարող է ազդել նավագնացության անվտանգության վրա։