Իրանը հայտարարում է ԱՄՆ «Աբրահամ Լինքոլն» ավիակրի վնասման մասին

Իրանի զինվորականները հայտարարել են, որ վնասել են ԱՄՆ ռազմածովային ուժերի խոշորագույն նավերից մեկը՝ «Աբրահամ Լինքոլն» ավիակիրը։ Այս մասին հայտարարել է Իրանի զինված ուժերի «Խաթամ ալ-Անբիա» կենտրոնական շտաբի խոսնակ, գնդապետ Էբրահիմ Զոլֆաղարին, հաղորդում է «ՌԻԱ Նովոստի»-ն՝ հղում անելով իրանական պետական IRIB հեռարձակողին։

Իրանական կողմի տվյալներով՝ ավիակիրը հարձակման է ենթարկվել Իրանի Իսլամական հեղափոխության պահապանների կորպուսի ռազմածովային ուժերի կողմից և դուրս է բերվել շարքից։ Զոլֆաղարին հայտարարել է, որ նավը լքել է տարածաշրջանը և այժմ ուղևորվում է դեպի ԱՄՆ։

Միևնույն ժամանակ իրանցի պաշտոնյան չի հայտնել, թե երբ է տեղի ունեցել հարձակումը և արդյոք այն կապված է ավելի վաղ հաղորդված հրթիռային արձակման հետ։ Ավելի վաղ տեղեկություններ էին տարածվել նաև, որ Դուբայի միջազգային ֆինանսական կենտրոնի (DIFC) մոտ պայթել է անօդաչու թռչող սարք, որը, նախնական տվյալներով, կարող էր պատկանել իրանական բանակին։