Միջազգային լարվածություն․ փորձագետը չի բացառում երրորդ համաշխարհային պատերազմի վտանգը Իրանի շուրջ

Մերձավոր Արևելքում ստեղծված իրավիճակը կարող է հանգեցնել գլոբալ բախման, այդ թվում՝ երրորդ համաշխարհային պատերազմի։ Այս մասին «Лента.ру»-ին տված հարցազրույցում հայտարարել է քաղաքականագետ Կոնստանտին Բլոխինը՝ նշելով, որ տարածաշրջանը ներկայում ամենաանհանգիստ և պայթյունավտանգ գոտիներից մեկն է։

Փորձագետի խոսքով՝ Իրանի շուրջ հակամարտությունը ներառում է բազմաթիվ դերակատարների շահեր՝ ԱՄՆ, Իսրայել, արաբական երկրներ, ինչպես նաև Ռուսաստանն ու Չինաստանը, որոնք ունեն ռազմավարական կապեր Թեհրանի հետ։ Նրա գնահատմամբ՝ իրավիճակը զարգանում է «դոմինոյի էֆեկտով», երբ մեկ երկրի դեմ գործողությունները կարող են ներգրավել մյուսներին և արագ վերածվել լայնածավալ բախման։

Բլոխինը նաև ընդգծել է, որ նման սցենարի կանխումը կախված է համաշխարհային առաջնորդների քաղաքական կամքից և զսպվածությունից։ Միևնույն ժամանակ տարածաշրջանում արդեն շարունակվում են ռազմական գործողությունները՝ Իրանի կողմից հարվածներ Բաղդադում գտնվող ԱՄՆ դեսպանատանը և Իսրայելի նոր հարվածներ Թեհրանին ու Բեյրութում «Հեզբոլլահ»-ի օբյեկտներին։