Bloomberg․ Իրանը պահպանել է նավթի արտահանման բարձր տեմպերը

Իրանը շարունակել է պահպանել նավթի արտահանման համեմատաբար բարձր տեմպերը՝ չնայած Մերձավոր Արևելքում լարվածության աճին և Օրմուզի նեղուցով մատակարարումների սահմանափակմանը։ Ինչպես հայտնում է Bloomberg-ը՝ հղում անելով Kpler վերլուծական ընկերության տվյալներին, մարտ ամսին Իրանի նավթի արտահանումը գրեթե համընկնում է նախորդ ամսվա ցուցանիշների հետ։

Ըստ տվյալների՝ Իրանը օրական արտահանում է միջինը մոտ 1,2 միլիոն բարել նավթ՝ նախորդ 1,5 միլիոնի դիմաց։ Միաժամանակ, տարածաշրջանի այլ երկրների արտահանումները կտրուկ նվազել են՝ օրական մոտ 14 միլիոն բարելից հասնելով ընդամենը 400 հազար բարելի։ Արդյունքում, համաշխարհային շուկա մատակարարված նավթի զգալի մասը բաժին է ընկել հենց Իրանին։

Վերլուծաբանների գնահատմամբ՝ Թեհրանի կոշտ քաղաքականությունը թույլ է տվել պահպանել իր վաճառքները՝ միաժամանակ սահմանափակելով մրցակիցների արտահանումը, ինչը նպաստել է էներգակիրների գների կտրուկ աճին։ Արդեն նկատվում է բենզինի թանկացում ԱՄՆ-ում, ինչպես նաև վառելիքի թանկացում և դեֆիցիտ այլ երկրներում։ Փորձագետները նշում են, որ այս զարգացումները կարող են գլոբալ ազդեցություն ունենալ՝ համեմատելի նույնիսկ համավարակի հետևանքների հետ։