Խաղաղության ամենամեծ թշնամին Նիկոլ Փաշինյանն է. Ռոբերտ Քոչարյան

«Ձախողված Նիկոլ Փաշինյանը ժողովրդին պետք է շանտաժ անի, պիտի վախեցնի պատերազմով։ Ո՞ր թեմայի շուրջ ինքը կարող է նստել ու խոսել։ Մեծ վտանգը ինքն է․ ինքը որ մնա, հաստատ պատերազմ ենք ունենալու»։ Այս մասին այսօր ասել է ՀՀ երկրորդ նախագահ Ռոբերտ Քոչարյանը՝  անդրադառնալով Նիկոլ Փաշինյանի սպառնալիքներին, թե  ՔՊ-ի ընտրությունների արդյունքում սահմանադրական մեծամասնություն չունենալու դեպքում  սեպտեմբերին աղետալի պատերազմ է սկսվելու։

«Պարադոքսալն այնտեղ այն է, որ իմ նախագահության ժամանակ ամենից խաղաղ տարիներն էին։ Ես այդ միտքը կրկնեմ՝ մեկ միջին ծավալի միջադեպ չենք ունեցել սահմանների վրա։ Միջադեպ չի եղել, փորձ անգամ չի եղել որևէ բան անել։ Տղա է բերում մեր ժողովրդի գլխին։ Առաջ գոնե սպառնալիքներն Ալիևն էր հնչեցնում, հիմա ինքն է հնչեցնում։ Ես չեմ բացառում, որ վաղը դուետով հնչեցնեն՝ երկուսով իրար մոտ կանգնեն ու տարբեր տոնայնությամբ սկսեն խոսել», – ասել է Քոչարյանը։

Երկրորդ նախագահը նկատել է, որ  Փաշինյանը խոսում է խաղաղության պայմանագրի մասին, որը, ըստ նրա, գոյություն չունի։ «Սա հետաքրքիր մանիպուլյացիա է․ կա մի թուղթ, որն իրավական ուժ չունի, բայց այդ թղթի մասին այնքան են խոսել, որ դարձել է իբր իրավական ուժ ունեցող։ Սակայն չունի այդ ուժը, և արդեն այդ թղթի շուրջ կանխատեսումներ են անում։ Հիմա ասում է՝ ես քանի տարի վարչապետ եմ, ի վիճակի եմ կանխատեսումներ անել։ Դու որ վարչապետ էիր, մինչև պատերազմը սկսելը ասում էիր՝ ինչ պատերազմ, ինչ բան։ Եթե այդ վերլուծական շնորհքն ունեիր, կգնայիր Արցախում կասեիր՝ Արցախը Հայաստան է և վերջ», – ասաց երկրորդ նախագահը։

Քոչարյանը հիշեցրել է, որ ՔՊ խմբակցության ղեկաարը պատերազմից մեկ շաբաթ առաջ հայտարարում էր, որ պատերազմի վտանգ չկա, Թուրքիան չի ներգրավվի, բայց այդ ժամանակ արդեն «Բայրաքթարները» տեղադրված էին Ադրբեջանում»։

«Մի մարդ, որը ընդհանրապես չունի վերլուծական ընդունակություն, չի կարող կանխատեսել, չի հասկանում՝ ինչ պետք է անել արտաքին հարաբերություններում, հիմա խոսում է այն մասին, որ ինքը որպես վարչապետ լավ է պատկերացնում իրավիճակը»,- նշել է Ռոբերտ Քոչարյանը ու ավելացրել, որ «Բայրաքթարներն Ադրբեջանում Փաշինյանը հայտարարում էր, թե կպայթեցնի Ադրբեջանը իր ինֆորմացիայով»։

Ռոբերտ Քոչարյանն ընդգծել է, որ խաղաղության ամենամեծ թշնամին Նիկոլ Փաշինյանն է, հարցին, թե իր իշխանության դեպքում պատերազմ չի՞ լինի՝ վստահեցրել է. «իհարկե, չի լինի»։