ԱՄՆ-ը «մոռանում է» Ուկրաինային․ Մերձավոր Արևելքի պատերազմը փոխում է առաջնահերթությունները

Ուկրաինան դադարել է լինել ԱՄՆ-ի հիմնական ուշադրության կենտրոնում՝ Մերձավոր Արևելքում Իրանի հետ սրվող հակամարտության ֆոնին։ Այդ մասին գրում է Lidovky-ն՝ նշելով, որ Վաշինգտոնի ռազմաքաղաքական ռեսուրսները գնալով ավելի շատ ուղղվում են նոր ճգնաժամի կառավարմանը։

Հրապարակման համաձայն՝ անվտանգության ոլորտի այն փորձագետները, որոնք դեռ հակամարտության սկզբից զգուշացնում էին, որ Մերձավոր Արևելքի պատերազմը կթուլացնի Ուկրաինայի դիրքերը, փաստորեն ճիշտ են գտնվել։ Նյութի հեղինակն ընդգծում է, որ Կիևը, նույնիսկ փորձելով ընդգծել իր կարևորությունը Վաշինգտոնի համար, կանգնելու է նոր հակաօդային պաշտպանության հրթիռների պակասի առաջ։

Նույն ընթացքում լարվածությունը Մերձավոր Արևելքում շարունակում է աճել․ Իրանի Իսլամական հեղափոխության պահապանների կորպուսի ռազմածովային ուժերը, ըստ նախնական տվյալների, հարվածել են ամերիկյան խոշորագույն ռազմանավերից մեկին՝ «Աբրահամ Լինքոլն» ավիակիրին, ինչը ավելի է խորացնում տարածաշրջանային ճգնաժամը և շեղում ԱՄՆ-ի ուշադրությունը Ուկրաինայից։