ՀԱԿ ակտիվիստների գործը հասել է դիվան-բաշուն

Նախկին դատավոր Պարգև Օհանյանը Լուրեր.com-ի հետ զրույցում դժվարացավ ասել՝ ՀԱԿ ակտիվիստների գործով Վճռաբեկ դատարանն ինչ որոշում կկայացնի, քանի որ ներքաղաքական իրավիճակում ՀԱԿ-ը պասիվ է:

«ՀԱԿ ակտիվիստների գործը, որտեղ առանձնապես բան էլ չկա, հասել է դիվան-բաշուն: Ես այնքան էլ լավատես չեմ, բայց մեծահոգություն միշտ սպասում եմ այն մարդկանցից, ովքեր բարձր դիրքեր են զբաղեցնում: Իշխանություն ունեցող բարձր դիրքում մարդը պետք է նաև մեծահոգի լինի, ողորմելի, ցածրակարգ մարդը չի կարող բարձր տեղեր գրավել»,-ասաց Օհանյանը:

Լրագրողի այն դիտարկմանը, թե տղաներին արդարացնելու համար արդարադատությո՞ւն է անհրաժեշտ, թե՞ մեծահոգություն, Օհանյանն ասաց.

«Մեծահոգությունը մտնում է արդարություն գաղափարի մեջ, որովհետև արդարություն ասելով՝ նաև Աստծուն ենք հասկանում: Արդարությունն իր մեջ ամփոոփում է այդ ամենը:

Այս գործին շատ ծանոթ չեմ, բայց գործը շատ շինծու է: Ձեր ասած արդարադատությունը չկա: Մենք չունենք պաշտպանության ինստիտուտ: Մենք այդ կետն օրենսգրքում ունենք, բայց որ պրակտիկայում դատարանը որոշում կայացներ, թե գործողությունները, թերևս, կատարվել են, բայց ինքնապաշտպանության սահմաններում կամ ծայրահեղ անհրաժեշտության ժամանակ կա՛մ պատահաբար, կա՛մ անզգույշ. նման բան չկա: Այս ուղղությամբ քննություն չի գնում, որովհետև վախենում են: Որովհետև կա պատվեր, հովանավորչություն, գործն անգամ կապում են Ալիկ Սարգսյանի հետ: Ես այս պահին դժվարանում եմ ենթադրություններ անել, բայց լսել եմ, որ դատարանները վերջերս փորձում են օբյեկտիվ երևալ,։ Տա՛ Աստված՝ օբյեկտիվության սահմաններում նաև այս գործը տեղավորվի»,-ասաց Օհանյանը:

Հիշեցնենք, որ 2011-ի օգոստոսի 9-ին բախում էր եղել ՀԱԿ-ի երիտասարդ ակտիվիստների և ոստիկանների միջև։ Ոստիկանները 7 ակտիվիստի բերման էին ենթարկել ոստիկանության Կենտրոնականի բաժին և քրգործ հարուցել իշխանության ներկայացուցչի նկատմամբ բռնության, ինչպես նաև խուլիգանության մեղադրանքով։ Ակտիվիստների պնդմամբ, ոստիկանները դաժան ծեծի են ենթարկել իրենց։

Հուլիսի 20-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը 6 տարվա ազատազրկման էր դատապարտել Տիգրան Առաքելյանին, 3 տարվա՝ Արտակ Կարապետյանին, և երկուական տարվա՝ Սարգիս Գևորգյանին ու Դավիթ Քիրամիջյանին։

ՀԱԿ ակտիվիստների ազատազրկման դատավճիռը բողոքարկվեց Վերաքննիչ քրեական դատարանում, սակայն դատարանը օրինական ուժի մեջ թողեց Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանի նախագահությամբ կայացված հուլիսի 20-ի դատավճիռը, որով ամբաստանյալները դատապարտվել էին երկուսից վեց տարվա ազատազրկման։

Քաղբանտարկյալների գործով դեկտեմբերի 13-ին դիմում է ներկայացվել Վճռաբեկ դատարան։

Վճռաբեկ դատարանն այս դիմումը վարույթ ընդունելու կամ մերժելու որոշումը պետք է կայացներ մինչև հունվարի 27-ը։ Գործը վարույթ չընդունելու դեպքում, հունվարի 28-ին Առաջին ատյանի դատարանի դատավճիռն ուժի մեջ կմտներ, և ստորագրությամբ ազատության մեջ գտնվող Սարգիս Գևորգյանը, Արտակ Կարապետյանը և Դավիթ Քիրամիջյանը կկալանավորվեին։

Հունվարի 24-ին ՀՀ Վճռաբեկ դատարանը, որոշում կայացրեց, վերադարձրել է Հայ ազգային կոնգրեսի ակտիվիստների նկատմամբ կայացված դատավճռի դեմ բերված բողոքը: Վճռաբեկ դատարանը ներկայացված բողոքում թերություններ էր հայտնաբերել և քսանօրյա ժամկետ է հատկացրել բողոքում հայտնաբերված թերությունները շտկելու և այն կրկին դատարան ներկայացնելու համար:

Գայանե Համբարձումյան