ԱՄՆ-ում մեկ մեքենայի գնով՝ Չինաստանում կարելի է գնել մինչև 5 էլեկտրամեքենա

Չինաստանի ավտոշուկայում գնային մրցակցությունը հասել է այնպիսի մակարդակի, որ ԱՄՆ-ում մեկ նոր ավտոմեքենայի միջին արժեքով հնարավոր է ձեռք բերել միանգամից մինչև հինգ չինական էլեկտրամեքենա։ Ինչպես հայտնում է Reuters-ը, ԱՄՆ-ում նոր մեքենայի միջին գինը կազմում է մոտ 51 հազար դոլար, մինչդեռ Չինաստանում վաճառվում են հարյուրավոր էլեկտրական մոդելներ՝ մինչև 25 հազար դոլար գնով։

Տվյալների համաձայն՝ Չինաստանում առկա են նույնիսկ էլեկտրամեքենաներ, որոնց արժեքը սկսվում է 6-12 հազար դոլարից։ Դրանց թվում են Geely EX2-ը, Wuling Motors Hongguang MiniEV-ը, ինչպես նաև BYD ընկերության մի քանի մոդելներ, որոնք մեծ պահանջարկ ունեն տեղական շուկայում։ Որոշ մոդելներ արդեն ունեն մինչև 300 մղոն ընթացքի պաշար և հագեցած են ժամանակակից տեխնոլոգիաներով։

Մասնագետների կարծիքով՝ նման ցածր գները պայմանավորված են Չինաստանի ներսում ծայրահեղ մրցակցությամբ և զանգվածային արտադրությամբ։ Սակայն այդ մեքենաները դեռևս չեն ներկայացվում ԱՄՆ շուկայում և հնարավոր է երբեք այնտեղ չհայտնվեն՝ կարգավորումների և շուկայի առանձնահատկությունների պատճառով։