Ինչպես է արձագանքել Թրամփը Իրանի բանակցային առաջարկին․ WSJ

ԱՄՆ նախագահ Դոնալդ Թրամփը և նրա ազգային անվտանգության խորհրդականները կասկածամտությամբ են ընդունել Իրանի առաջարկը՝ բազմափուլ բանակցությունների վերաբերյալ, հաղորդում է The Wall Street Journal-ը՝ հղում անելով ԱՄՆ վարչակազմի աղբյուրներին։

Հրապարակման համաձայն՝ Սպիտակ տունը դեռևս չի մերժել Թեհրանի առաջարկը, սակայն ԱՄՆ նախագահը քննադատել է իրանական կողմին՝ Վաշինգտոնի գլխավոր պայմանից՝ ուրանի հարստացման դադարեցումից խուսափելու համար։ Ակնկալվում է, որ ամերիկյան կողմը շուտով կներկայացնի իր սեփական այլընտրանքային առաջարկը՝ ի պատասխան իրանական ծրագրի։

Նշվում է, որ իրանական «ճանապարհային քարտեզը» ներառում է երեք հաջորդական փուլ։ Առաջինը նպատակ ունի դադարեցնել ռազմական գործողությունները և ամրագրել չհարձակման պարտավորությունները Իսլամական Հանրապետության և Լիբանանի դեմ։ Երկրորդ փուլը ներառում է Հորմուզի նեղուցում նավարկության ռեժիմի շուրջ համաձայնեցում։ Վերջնական՝ երրորդ փուլը նվիրված կլինի Իրանի միջուկային ծրագրի քննարկմանը։