Խորհրդարանը քննարկել է ՀՀ դատախազության 2025 թ. գործունեության մասին հաղորդումը

ՀՀ ԱԺ մայիսի 6-ի հերթական նիստում քննարկվել է ՀՀ դատախազության 2025 թվականի գործունեության մասին հաղորդումը:

«2025 թվականի ընթացքում Դատախազության բացառիկ՝ պետական եւ համայնքային շահերի պաշտպանության լիազորության շրջանակում կայացված դատական ակտերով, ինչպես նաեւ դատախազական ներգործության միջոցների կիրառման արդյունքում Հայաստանի Հանրապետության եւ համայնքների սեփականությանը կամ տիրապետմանն է վերադարձվել, նախնական գնահատմամբ, շուրջ 66 միլիարդ 934 միլիոն դրամ շուկայականին մոտարկված կադաստրային արժեքով 124 միավոր գույք: Գույքի շարքում են մանկապարտեզներ, մշակույթի տուն, մարզադաշտ, բնության հուշարձաններ, պուրակ, հողատարածք, անտառային տարածքներ»,- նշել է ՀՀ գլխավոր դատախազ Աննա Վարդապետյանը:

Անդրադառնալով նախաքննության ժամկետների նվազման փաստին՝ Աննա Վարդապետյանն ասել է, որ վերջին տարիներին արձանագրված միտումը պահպանվել է նաեւ 2025 թվականին: Նախորդ տարի ավարտված քրեական վարույթների կեսից ավելին՝ 53,4 տոկոսը, քննվել է մինչեւ 2 ամիս ժամկետում, ինչը 2024 թվականի համապատասխան ցուցանիշը գերազանցում է 11,3 տոկոսով: Նշվել է, որ վերջին 8 տարիների միջինացված ցուցանիշների հետ համեմատ՝ 2025 թվականին 2,5 տոկոսով նվազել է կալանքը որպես խափանման միջոց ընտրելու՝ դատարան ներկայացված միջնորդությունների տեսակարար կշիռը՝ մեղադրյալների ընդհանուր թվի համամասնությամբ:

2025 թվականին ավարտվել է 3495-ով կամ 9,2 տոկոսով ավելի քրեական վարույթ, քան 2024 թվականին: Հաստատված մեղադրական եզրակացությամբ դատարան է հանձնվել 2807-ով կամ 23,8 տոկոսով ավելի քրեական վարույթ: Քրեական վարույթներով գործարկման օրվանից՝ 2024 թվականի դեկտեմբերի 5-ից մինչեւ 2025 թվականի դեկտեմբերի 31-ն ընկած ժամանակահատվածում Վերականգնված միջոցների միասնական հաշվին եւ Հարկ վճարողի միասնական հաշվին փաստացի վճարվել է ընդհանուր 39 միլիարդ 895 միլիոն 845 հազար դրամ:

Ներքին գործերի նախարարության հանցավորության վիճակագրության եւ վերլուծության կենտրոնի տրամադրած տվյալների համաձայն՝ Հայաստանի Հանրապետությունում 2025 թվականին հանցագործության դեպքերը նվազել են: 2025 թվականին Հայաստանի Հանրապետությունում կատարվել է 40.722 հանցագործություն, որից 18.857-ը՝ Երեւանում: 2024 թվականի համեմատ 2025 թվականին հանցագործությունների դեպքերը նվազել են 3,2 տոկոսով կամ 1335-ով: 2025 թվականին արձանագրվել է հանցագործությունների բացահայտման ցուցանիշի աճ: Այն կազմել է 29,7 տոկոս, իսկ բացահայտման ցուցանիշի աճը կազմել է 6,9 տոկոս: Հանցագործության 40.722 դեպքի բացարձակ մեծամասնությունը՝ 82,6 տոկոսը, ոչ մեծ եւ միջին ծանրության հանցագործություններ են, այսինքն՝ նվազ հանրային վտանգավորություն ունեցող հանցագործություններ: 2024 թվականի համեմատ հանցավորության ընդհանուր ծավալի մեջ արձանագրվել է ծանր եւ առանձնապես ծանր հանցագործությունների տեսակարար կշռի նվազում՝ 0,9 տոկոսով: 2025 թվականին ավարտվել է 41.553 քրեական վարույթ:

Անդրադառնալով կոռուպցիոն հանցագործություններին՝ ՀՀ գլխավոր դատախազը նշել է, որ արդեն երկրորդ տարին անընդմեջ Հայաստանի Հանրապետությունում գրանցվում է դրանց թվի նվազում:

ՀՀ դատախազության 2025 թվականի գործունեության մասին հաղորդման առնչությամբ Աննա Վարդապետյանը պատասխանել է պատգամավորների հարցերին եւ ներկայացրել մի շարք պարզաբանումներ:

Հաղորդման վերաբերյալ ելույթներ են ունեցել պատգամավորները:

Հարցի քննարկումը կշարունակվի վաղը` մայիսի 7-ին:

«ԱԺ կանոնակարգ» սահմանադրական օրենքի համաձայն՝ օրվա վերջին հիմնական նիստի՝ Ազգային ժողով-Կառավարություն հարցուպատասխանի ժամանակ հարցեր չեն գրանցվել:

Պատգամավոր Հռիփսիմե Գրիգորյանը փոխանցել է գյումրեցիների շնորհակալությունը՝ Հանրապետության երկրորդ քաղաքում անցկացված միջոցառման համար: Նա շնորհավորել է բոլորին Հայաստանում նման մեծամասշտաբ ու աննախադեպ միջոցառումների հաջող կազմակերպման կապակցությամբ: