«02» հաղորդաշարը մոռանո՞ւմ է անմեղության կանխավարկածի մասին (տեսանյութ)

2013 թվականի հունվարի 24-ին «02» հաղորդաշարով ցուցադրվել է մի ռեպորտաժ, որը խախտել է ձերբակալված Վոլոդյա Գալստյանի անմեղության կանխավարկածը:

«Նախաքննության փուլում ինֆորմացիան գաղտնի է պահվում: Սահմանադրությամբ անձին տրված իրավունքները ոտնահարվում են ամեն քայլափոխի, նույնիսկ՝ հենց ոստիկանության կողմից: Նյութը նայելուց պարզ է դառնում, որ Վոլոդյա Գալստյանի նկատմամբ որպես խափանման միջոց կալանավորումն ընտրվել է 21-ին, իսկ 24-ին՝ ցուցադրվել Հանրային հեռուստաընկերության եթերում, որը նկարահանվել է ավելի վաղ, երբ անձը որպես մեղադրյալ ներգրավված և կալանավորված չի եղել: Դրանով խախտվել է նրա սահմանադրական իրավունքը՝ տարածելով ապատեղեկատվություն:

Նշենք, որ Վոլոդյա Գալստյանն իրեն մեղավոր չի ճանաչել իր ցուցմունքներով, ընդհակառակը, նա փորձում է պարզաբանել իրեն առաջադրված մեղադրանքները, դրանց իսկությունը»: Այս մասին այսօր լրագրողների հետ հանդիպմանն ասաց «Գալիկյան» փաստաբանական գրասենյակի փաստաբան, Վոլոդյա Գալստյանի պաշտպան Սուրեն Մնացականյանը:

Վերջինիս խոսքով՝ Վոլոդյա Գալստյանը դատապարտված չի եղել: Ամուսնացած է, ունի 2 անչափահ երեխա, ընտանիքի միակ կերակրողն ինքն է: Զբաղվել է օրինական բիզնեսով իրեն պատկանող «Սիսիան» ՍՊԸ-ի միջոցով: «Ովքեր ճանաչում են նրան՝ բնութագրում են որպես պարկեշտ անձնավորություն, իսկ այս հաղորդաշարի շրջանակներում ընտանիքը կրում է զրկանքներ: Մարդիկ սկսել են նրանց վատ աչքով նայել, իսկ Վոլոդյային հասարակությունը հանցագործ է համարում:

Նշեմ, որ հաղորդաշարում նշվում է, թե նրան բերման են ենթարկել, բայց դա ևս ապատեղեկատվություն է՝ նա ինքնակամ է ներկայացել: Անգամ նրա առողջական վիճակը վատացել է, տարել են հիվանդանոց, ազատ են արձակել, որից հետո ոստիկանության հրավերով ներկայացել է ոստիկանություն և ձերբակալալվել: Գործում առկա չէ ոչ մի ապացույց՝ թե՛ ուղղակի, թե՛ անուղղակի, որը կտա թեկուզ թեթևակի կասկած, որը կվկայի մեղսագրված արարքում Վոլոդյայի մեղավորությունը»,- ասաց փաստաբանը:

Lurer.com-ի հարցին ի պատասխան՝ փաստաբանը նշեց, որ քանի որ գործը նախաքննության փուլում է, չի կարող մանրամասներ հաղորդել: «Ոստիկանության և հանրային հեռուստաընկերության կողմից խախտվել է անմեղության կանխավարկածը: Դրանով իսկ արատավորում են մարդու բարի համբավը: Այսօր մենք դիմելու ենք ոստիկանապետին, գլխավոր դատախազին և Հ1 հեռուստաընկերությանը՝ հերքման պահանջով»:

Վոլոդյա Գալստյանի կինը՝ Լիլիթ Դանիելյանը, ով ևս ներկա էր ասուլիսին, նշեց, որ աղջիկը, ով սովորում է 10-րդ դասարանում, այդ ռեպորտաժից հետո դպրոցում լսում է, թե ինչպես են խոսում իր հոր մասին։ «Ի վերջո, Սիսիանը փոքր է, և բոլորն իրար ճանաչում են, ամաչում ենք արդեն»,-ասաց Վոլոդյա Գալստյանի կինը: